Aqmola oblysynda bir táýliktiń ishinde jolda qalǵan 56 adam evakýatsııalandy
KÓKShETAÝ. QazAqparat - Aqmola oblysynda bir táýliktiń ishinde jolda qalǵan 56 adam jylytý pýnktterine evakýatsııalandy, onyń altaýy bala, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, evakýatsııalaý sharalary jergilikti atqarýshy organdar, medıtsına jáne polıtsııa qyzmetkerlerimen birlesip ótkizildi.
«Qutqarýshylar azamattardy óńirdiń blok-beketterinen jylytý pýnktterine evakýatsııalady. Máselen, tek Sandyqtaý aýdanynda 30 adam evakýatsııalandy. Olardyń barlyǵy aýdannyń jylytý pýnktine jetkizildi. Taǵy 11 adam, onyń ishinde 3 bala Ereımentaý aýdanynyń pýnktine ornalastyryldy. Jaqsy aýdanynda qutqarýshylar dárigerlermen birge júkti áıeldi aýdandyq aýrýhanaǵa jetkizdi. Sol kúni Zaporoje aýylynda jedel soqyrishek dıagnozy qoıylǵan bes jasar balany qutqarýshylar aýrýhanaǵa jetkizdi. Qalyń qar saldarynan jedel járdem kóligi patsıentterge jete almady. Qazir áıel men bala aýrýhanada jatyr, jaǵdaıy qanaǵattanarlyq», - dedi Aqmola oblysy TJD bastyǵynyń orynbasary Qanat Dospaev.
Aıta keteıik, bıylǵy jylǵa naýryzdyń 11-de aýa temperatýrasynyń tómendeýi, boran, kóktaıǵaqtyń saldarynan Aqmola oblysy aýmaǵynda respýblıkalyq jáne oblystyq mańyzy bar avtojoldardyń ýchaskeleri jabyldy.
