Aqmola oblysynda bir táýliktiń ishinde polıtseıler 19 páter urlyǵyn ashty
KÓKShETAÝ. QazAqparat - Aqmola oblysynda bir táýliktiń ishinde 19 páter urlyǵynyń beti ashyldy. Bul týraly oblystyq ІІD baspasóz qyzmetinen habarlady.
Polıtseılerdiń málimeti boıynsha oblys aýmaǵynda «Páter» jedel-aldyn alý sharasy júrgizilýde. Oblystyq ІІD uıymdastyrýymen ótip jatqan sharanyń maqsaty páter urlyǵyn ashyp, aldyn alý bolyp tabylady.
«Páter» jedel-aldyn alý sharasynyń alǵashqy kúni 19 páter urlyǵynyń beti ashyldy. Páter tonaýshylar negizinen tereze, esikti nemese qulypty buzyp kiredi. Jyl basynan beri oblysta 900 astam páter tonaý oqıǵasy tirkelgen», dep kórsetilgen habarlamada.
Máselen, Jaqsy aýdanynda qaskóıler jergilikti turǵynnyń jekemenshik úıine túsip, aqshalaı qarjat pen azyq-túlikti jymqyryp ketken. Osylaısha, úı ıesine 55 myń teńge kóleminde shyǵyn keltirilgen. Jedel izdestirý sharasy barysynda «Alfa» esimdi ıisshildiń kómegimen 36 jastaǵy jergilikti turǵyn qolǵa tústi.
Sonymen qatar, atalǵan shara aıasynda polıtseıler turǵyndarǵa páterlerin ortalyqtandyrylǵan beıne baqylaý pýltine qosý, beıne baqylaý júıesi jáne qaýipsizdiktiń qazirgi zamanǵy tehnıkalyq qural jabdyqtaryn ornatý erejesin túsindirýde.
Qazirgi ýaqytta óńirde 638 páter men jekemenshik úı ıesi osyndaı qaýipsizdik sharalaryn qolǵa alyp otyr. «Páter» jedel-aldyn alý sharasy 27-shi shildege deıin jalǵasatyn bolady.
