Aqmola oblysynda bir kúnde 3 jol apatynan 3 adam zardap shekti
KÓKShETAÝ. QazAqparat - Aqmola oblysynda bir táýliktiń ishinde 3 jol apaty bolyp, úsh adam zardap shekti, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, 3 qazan kúni Kókshetaý qalalyq PB kezekshilik bólimine jedel járdem kóliginiń feldsheri habarlasyp, Baımuqanov jáne Esenberlın kósheleriniń qılysynda jol apaty oryn alǵanyn aıtqan.
«Oqıǵa ornyna jetken tártip saqshylary Baımuqanov kóshesinde velosıpedpen júrip kele jatqan 1957 jylǵy er adamdy «Hyundai Elantra» kóligi qaǵyp ketkenin anyqtaǵan. Solǵa burylyp bara jatqan kólik júrgizýshisi velosıpedshige jol bermegen. Zardap shekken velosıpedshi Aqmola oblystyq kópbeıindi aýrýhanasyna jetkizildi», - deıdi vedomstvodan.
Sol kúni Tselınograd aýdany aýmaǵynda eki jol apaty tirkeldi.
«Nur-Sultan qalasynyń 43 jastaǵy turǵyny tizgindegen «Nissan Almera» kóligi «Nur-Sultan-Ereımentaý-Shiderti» tas jolynyń boıynda «Volkswagen Golf» kóligimen soqtyǵysqan. «Volkswagen Golf» kóligi isten shyǵyp joldyń shetinde toqtap turǵan. Jol apatynan atalmysh kóliktiń 39 jastaǵy júrgizýshisi túrli aýyr jaraqattarmen Nur-Sultan qalasyndaǵy Travmatologııa jáne ortopedııa ǵylymı- zertteý ınstıtýtynyń jansaqtaý bólimine jatqyzyldy. Sol kúni Qosshy aýylyndaǵy Baýbek batyr kóshesinde «Shacman» júk kóligi men «VAZ-21099» jeńil kóligi soqtysty. Bul jol apatynan jeńil kóliktiń 61 jastaǵy júrgizýshisi, Taıtóbe aýylynyń turǵyny Nur-Sultan qalasyndaǵy №2 qalalyq aýrýhanasyna jetkizildi», - dedi PD baspasóz qyzmetindegiler.
Vedomstvodan atap ótkendeı, qazirgi kezde úsh jol-kólik oqıǵasyna qatysty Qylmystyq kodekstiń 345-baby boıynsha sotqa deıingi tergeý amaldary júrgizilýde.
