Aqmola oblysynda bir kúnde 100-den astam kólik soqtyǵysty
KÓKShETAÝ. QazAqparat - Aqmola oblysynyń 5 aýdanynda aýa raıynyń kúrt qubylýy saldarynan 100-den astam avtokólik soqtyǵysty, dep habarlaıdy QazAqparat.
QR ІІM Tótenshe jaǵdaılar jónindegi komıtettiń resmı ókili Rýslan Imanqulovtyń aıtýynsha, tańǵy saǵat 08:30 bastap, aýa raıyna baılanysty Aqmola oblysynda avtokólikterdiń barlyq baǵyttary ýaqytsha jabyldy.
«Arshaly, Astrahan, Ereımentaý, Tselınograd, Shortandy aýdandarynda avokólik keptelisteri boldy. Avtomobıl joldaryn tazalaý men qutqarý jumystaryna 158 birlik arnaıy tehnıka (jol qyzmeti, jergilikti atqarýshy organdar, TJD-19) jáne jeke quramnyń 171 qyzmetkeri jumyldyryldy», - dedi Rýslan Imanqulov.
Sonymen qatar, Aqsýat orta mektebiniń 2 qabatty ǵımaratynyń shatyry (120 sharshy metr), Erkinshilik orta mektebiniń 3 qabatty ǵımaratynyń shatyry (1700 sharshy metr) jáne Balalardyń shyǵarmashylyq úıiniń 2 qabatty ǵımaratynyń shatyry (50 sharshy metr) jelge ushty.
Aýa raıynyń tosyn minezinen zardap shekender joq. Apatty-qutqarý jumystary odan ári jalǵasýda.
