Aqmola oblysynda bir azamat óziniń týǵan ulyn óltirdi degen kúdikpen qamaýǵa alyndy
ASTANA. 18 qazan. QazAqparat /Jasulan Amanbaıuly/ - Aqmola oblysynda jan túrshigerlik oqıǵa oryn aldy, Tselınograd aýdanyna qarasty Qabanbaı batyr aýylynyń turǵyny óziniń týǵan ulyn óltirdi.
Aqmola oblystyq ІІD baspasóz qyzmetiniń habarlaǵanyndaı, 15 qazan kúni aýdandyq bólimshege ýchaskelik ınspektordan eldi mekendegi úıleriniń birinen 1970 jyly týǵan azamattyń máıiti tabylǵandyǵy jóninde telefon habarlamasy kelip túsken.
«Sot-medıtsınalyq saraptamanyń aktisi boıynsha, ólim kókirek tusyndaǵy ótkir zatpen shanshylǵan-kesilgen jaraqattyń saldarynan bolǵan», - delingen baspasóz habarlamasynda.
Jedel-izdestirý operatsııasy barysynda, azamatqa aýyr jaraqattar salyp, ajal qushtyrǵan 1954 jyly týǵan onyń óz ákesi ekendigi anyqtalady.
Qazirgi ýaqytta adam óltirdi degen aıyppen qylmystyq is qozǵaldy. Qandyqol áke tergeý ızolıatorynda qamaýda otyr.
