Aqmola oblysynda bir aıǵa tolmaǵan sábıden koronavırýs anyqtaldy
KÓKShETAÝ. QazAqparat – Aqmola oblysynda sońǵy táýliktiń ishinde koronavırýs ınfektsııasyn juqtyrýdyń 10 jaǵdaıy tirkeldi, dep habarlaıdy QazAqparat tilshisi oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetine silteme jasap.
«Aqkól aýdanynda 5 adamnan turatyn bútin bir otbasynyń koronvırýs juqtyrǵany anyqtaldy. Onyń bireýi 2020 jyldyń maýsym aıynda týǵan bala, ekinshisi 54 jastaǵy er adam jáne qalǵandary 53, 28 jáne 18 jastaǵy áıelder. Budan bólek, Ereımentaý aýdanynda 4 adamnan, ıaǵnı 74, 69 jastaǵy eki er adam jáne 68, 54 jastaǵy eki áıelden indet anyqtaldy. Al Kókshetaý qalasynda 57 jastaǵy áıel juqtyrǵan», - deıdi vedomstvodan.
Vedomstvodan atap ótkendeı, koronavırýs anyqtalǵan 10 adamnyń altaýy buryn juqtyrǵandarmen baılanysta bolǵandar. «Naýqastarǵa bekitilgen klınıkalyq hattamaǵa sáıkes medıtsınalyq kómek kórsetiledi. Úı oshaǵynda epıdemııaǵa qarsy dezınfektsııalaý, sondaı-aq, naýqastarmen baılanysty bolǵan adamdary anyqtaý boıynsha sanıtarlyq-epıdemıologııalyq sharalar júrgiziledi», - dep tolyqtyrdy vedomstvodan.
Aıta keteıik, jalpy, Aqmola oblysynda koronavırýs juqtyrǵandardyń sany 482 adamdy qurady.
