Aqmola oblysynda bir aptanyń ishinde 3 bala terezeden qulaǵan
KÓKShETAÝ. QazAqparat - Aqmola oblysyndaǵy kóp qabatty úılerdiń terezelerinen jas balalardyń qulap ketýine jáne olardyń aýyr jaraqat alýyna nemese tipti ólimine ákep soqqan oqıǵalardyń negizgi sebebi ata-analardyń nemquraılylyǵy jáne jas balalardy qaraýsyz qaldyrý bolyp otyr. Bul týraly brıfıngide Aqmola oblysy TJD bastyǵy Nurlan Atyǵaev málim etti, dep habarlaıdy QazAqparat tilshisi.
Departament basshysynyń aıtýynsha, jyl saıyn kúnniń jylýymen oblysta kóp qabatty úılerdiń terezelerinen eki jastan alty jasqa deıingi balalardyń qulap ketýine baılanysty jazataıym oqıǵalardyń sany artyp keledi. Máselen, bıylǵy jyldyń bes aıynda Aqmola oblysy boıynsha kópqabatty úılerdiń terezelerinen jas balalardyń qulap ketýiniń tórt jaǵdaıy tirkeldi, onyń ishinde ótken aptada ǵana úsh oqıǵa oryn aldy.
«Búginde úsh bala aýrýhanadan shyǵarylyp, úıde jatyr, olardyń jaǵdaıy turaqty. Máselen, 14 mamyrda Kókshetaý qalasynda bala ólimimen aıaqtalǵan bir oqıǵa tirkeldi. Barlyq jazataıym oqıǵalardyń negizgi sebebi ata - analardyń qarapaıym nemquraılylyǵy, atap aıtqanda, jas balalardy qaraýsyz qaldyrý, jaqyn mańdaǵy eresekterdiń uqypsyzdyǵy bolyp tabylady», - dep atap ótti N.Atyǵaev.
Osy rette, óńirdiń bas qutqarýshysy aqmolalyqtarǵa jas balalardy eshqashan jalǵyz qaldyrmaýǵa, balanyń tereze aldy taqtaıyna kóterile almaýy úshin jıhazdyń barlyq túrlerin terezeden alystatýǵa, balaǵa birneshe santımetrden artyq tereze ashýǵa múmkindik bermeıtin arnaıy bekitkishter qoıýǵa, sondaı-aq, balanyń eresekterdiń qaraýynsyz balkonǵa shyǵýyna jol bermeý týraly keńes beredi.
