Aqmola oblysynda bilikti dárigerlerdiń sany artyp keledi
KÓKShETAÝ. QazAqparat - Aqmola oblysynda bilikti dárigerlerdiń sany artyp keledi. Qazir kezde oblys turǵyndaryna barlyǵy 1787 dáriger qyzmet etýde. Oǵan qosa, orta medıtsınalyq mamandardyń qataryn kóbeıtý jasparda bar, dep habarlaıdy QazAqparat tilshisi.
Aqmola oblystyq densaýlyq saqtaý basqarmasy baspasóz qyzmetiniń deregi boıynsha oblys turǵyndaryna 587 densaýlyq saqtaý nysandary qyzmet kórsetedi. Onyń ishinde 31 mekeme stantsıonarlyq kómek kórsetýmen aınalysady. Oǵan 16 ortalyq aýdandyq aýrýhana, 7 emhana, 99 dárigerlik ambýlatorııa, 48 feldsherlik akýsherlik pýnkti, 393 medıtsınalyq pýnkti jáne 9 ózge de mekemeler kiredi.
Aǵymdaǵy jyly jalpy tájirıbedegi dárgirlerge júktemeni azaıtý baǵytynda 1800 adamǵa bir jalpy tájirıbedegi dárigerden keldi. Medıtsınalyq uıymdarda qosymsha 62 jalpy tájirıbedegi dáriger ýchaskesinen keldi.
Osy rette, ýchaskelik terapevt pen pedıatrolarǵa júkteme azaıtylatyn bolady.
Oblysta kadrlardy tartý jumystary turaqty túrde júrgizilýde. Máselen, ótken jyldyń ózinde oblysqa 140 dáriger mamandar jáne 244 orta medıtsınalyq qyzmetkerler keldi.
Atap ótý kerek, oblysqa syrttan kelgen dáriger mamandarǵa áleýmettik kómek kórsetiledi. 2017 jyly 61 maman baspanaly boldy. Onyń 20-y páterdi oblys ortalyǵynan aldy. Oǵan qosa, 39 medıtsına mamanyna 6,2 mıllıon teńge kóleminde bir rettik kóterme syıaqy, 65 medıtsına qyzmetkerine 217,3 mıllıon teńge kóleminde jeńildetilgen nesıe berildi.
Kókshetaý qalalyq aýrýhanasynyń bas dárigeri Serik Kákenov ótken jyly 3 jas mamanyń kelgenin aıtýda. Sonyń biri terapevt dáriger Dınara Qasymova.
«Men Astanadaǵy medıtsınalyq ýnıversıtetti bitirdim. Qazirgi kezde Kókshetaý qalalyq aýrýhanasynyń nevrologııalyq bólimshesinde dáriger - ordınator bolyp qyzmet isteımin. Jumysqa qabyldanǵan kezde bir rettik kóterme syıaqy aldym. Jumysym ózime unaıdy. Ujym da kóńilimnen shyǵady», deıdi jas maman.
