Aqmola oblysynda bes myńnan astam 1-synyp oqýshysy týberkýlezge qarsy egildi

KÓKShETAÝ. QazAqparat – Aqmola oblysynda birinshi synypta oqıtyn 5290 bala týberkýlezge qarsy revaktsınatsııadan ótti, dep habarlaıdy QazAqparat tilshisi.

Oblystyq sanıtarııalyq-epıdemıologııalyq baqylaý departamenti basshysynyń orynbasary Serik Omarhanovtyń aıtýynsha, óńirde mantý synamalaryn júrgizý jáne BTsJ revaktsınatsııasynyń qorytyndysy shyǵaryldy.

«BTsJ revaktsınatsııasyna balalardy irikteý maqsatynda mantý synamasyn mektepte birinshi synyp oqýshylaryna alty jasynda, oqý jylynyń birinshi aıynda (qyrkúıek) qoıady. Búgingi tańda mektepterde vaktsınatsııa jumystary toqtatyldy. 30 qyrkúıektegi málimetter boıynsha 12 myńǵa jýyq birinshi synyp oqýshysy týberkýlın dıagnostıkasymen qamtyldy. Onyń ishinde 10 429 (87,2 paıyz) bala tekserilse, 342 (2,9 paıyz) bala tekserilmedi, densaýlyǵyna baılanysty jiberilmegeni – 812 (6,8 paıyz), bas tartqandar sany – 382 (3,2 paıyz) bala», - dep atap ótti Serik Omarhanov.

Týberkýlezge (BTsJ) qarsy revaktsınatsııamen qamtylýy tıis birinshi synyp oqýshylarynyń sany 5 myń 745 bolsa, onyń 5 myń 290 (92,1 paıyz) egildi, 455-i (7,9 paıyz) egilmedi.

«Vaktsına týberkýlezdiń, týberkýlez menıngıtiniń jáne aýrýdyń basqa da aýyr túrleriniń aldyn alý maqsatynda ımmýnıtetti qalyptastyrady, aǵzanyń tózimdiligin arttyrady», - dep tolyqtyrdy Serik Omarhanov.

Aıta ketsek, budan buryn Aqmola oblysynda týberkýlezdiń aldyn alý sharalary qalaı júrgizilip jatqanyn jazǵan edik.