Aqmola oblysynda belsendi jastar marapattaldy

KÓKShETAÝ. QazAqparat - El Táýelsizdiginiń 30 jyldyǵy men Halyqaralyq Jastar kúnin merekeleý aıasynda Tselınograd aýdanynda qoǵamdyq jáne mádenı ómirge belsendi qatysyp, óńirdiń damýyna úles qosyp júrgen jastar marapattaldy, dep habarlaıdy QazAqparat oblystyq ishki saıasat basqarmasyna silteme jasap.

Sharaǵa qatysýshylardy Tselınograd aýdany ákiminiń orynbasary Alma Aıtqojınova quttyqtady.

«Elimizdiń bolashaǵy bilimdi jáne talantty jastardyń qolynda. Búgingi tańda qoǵamnyń qozǵaýshy kúshi retinde ozyq ıdeıalarmen qarýlanǵan jastar aldyńǵy urpaqtyń jolyn jalǵastyryp, eldiń damýy men gúldenýine úles qosýda. Sizderdiń qajyrly eńbekterińizdiń arqasynda jańa belesterdi baǵyndyryp, Otanymyzdyń órkendeýi jolynda zor tabystarǵa jetetinderińizge senimdimin», - dep atap ótti aýdan ákiminiń orynbasary.

Shara barysynda Alma Aıtqojınova aýdan ákiminiń belsendi jastarǵa, sonyń ishinde volonterler men túrli qyzmet salalarynyń ókilderine alǵys hattar tabys etti. Marapattalǵandardyń arasynda Tselınograd aýdany Aqmol aýyldyq okrýginiń ýchaskelik ınspektory Aqylbek Tasbolatov bar. Aýyl turǵyndarynyń ózderi atap ótkendeı, jas jigit erlik pen batyrlyqtyń jarqyn úlgisin kórsetip, ofıtserlik shendi abyroımen atqaryp júr. Ol qoǵamdyq tártipti saqtaýdy qamtamasyz etýden basqa, aýyldyń áleýmettik ómirine, aýdannyń mobıldi monıtorıngtik tobynyń jumysyna qatysady.

Aýdan jastarynyń kórnekti ókilderiniń biri Tselınograd balalar -jasóspirimder sport mektebiniń mamany Beksultan Matmuratov. Jas jigit karantın kezeńinde halyqtyń áleýmettik osal toptaryna azyq-túlik taýarlaryn, sondaı-aq zeınetkerlerge dárilik preparattardy jetkizý boıynsha kómek kórsetti.

Aıta keteıik, aýdanda 14 pen 29 jas aralyǵyndaǵy 17 000-ǵa jýyq jastar turady.