Aqmola oblysynda «Báıterek» ornatyldy
KÓKShETAÝ. QazAqparat – Endi Aqmola oblysynyń da óz «Báıteregi» bar. Stantsıonnyı aýylyndaǵy «Astananyń on jyldyǵy» saıabaǵynda Báıterek formasynda 11 metrlik shaǵyn sáýlet qurylysy ornatyldy, dep habarlaıdy «QazAqparat» HAA tilshisi.
Stantsıonnyı aýylynyń ákimi Ardaq Tasqynbaıdyń aıtýynsha, eldi mekende ádemi estetıkalyq reń beretin eskertkishter men kórneki jerler buǵan deıin bolmaǵan. «Báıterek» aýyl turǵyndary men qonaqtaryn qýantatyn alǵashqy shaǵyn músin.
«11 jyl buryn, elordamyzǵa 10 jyl tolǵan kezde, Stantsıonnyı eldi mekeninde «Astananyń on jyldyǵy» saıabaǵy ashylǵan edi. Alaıda, aqshalaı qarajattyń bolmaýy sebebinen uzaq ýaqyt kútim kórgen joq. Eki jyl buryn qala basshylyǵy saıabaqta jóndeý jumystaryn ótkizý týraly sheshim qabyldap, qajetti qarjy bólindi. 2018 jyly antıvandaldyq oryndyqtar men jáshikter ornatylyp, aǵashtar, butaqtar men gúlder otyrǵyzyldy. Alaıda jańa saıabaqta da, eldi mekenniń ózinde de birde-bir shaǵyn arhıtektýralyq qurylys bolǵan emes. Sol kezde «Astananyń on jyldyǵy» saıabaǵynda» atyna zaty zaı bola alatyn eskerkishti ornatý ıdeıasy týyndady. Oǵan qosa, ótken jyly elordamyz 20 jyldyǵyn atap ótti, sol sebepti «Báıterekti» tańdadyq», - dedi Ardaq Tasqynbaı.
11 metrlik «Báıterek» temir tabaqtardan, buryshtar men armatýralardan jasalǵan. Jobanyń quny 4 mln teńgeni qurady. Degenmen, bul somaǵa «Báıterekti» ornatý men jaryqtandyrýdan bólek, saıabaqtyń qaqpalary men qorshaýyn qaıta qalpyna keltirý, boıaý jumystary kirdi.
Eldi meken ákiminiń aıtýynsha, sońǵy 2-3 jyl ishinde aýylda kúrdeli ózgerister bolyp jatyr. Biraq júrgizilip jatqan jumystarǵa qaramastan, sheshimin tabýy tıis máseleler áli de bar.
«Kókshetaý qalasynyń Qurylys bólimi qazirgi tańda 160 orynǵa arnalǵan Mádenıet úıiniń jobalyq-smetalyq qujattaryn ázirleýde. Onyń ishinde ámbebap sporttyq jáne horeografııalyq zaldar, ártúrli úıirme synyptary, elektrondyq kitaphana bolady dep josparlanǵan. Aqmola oblysy Densaýlyq saqtaý basqarmasy eldi mekenimizde otbasylyq-dárigerlik ambýlatorııanyń qurylysyna bıýdjettik ótinim berý úshin qajet qujattardy daıyndady. 2020 jylǵa josparlarymyz óte kóp», - dep sózin túıindedi A.Tasqynbaı.
