Aqmola oblysynda barymtashylar toby ustaldy
KÓKShETAÝ. QazAqparat - Aqmola oblysynda mal urlyǵymen aınalysqan barymtashylar toby ustaldy. Kúdiktilerdiń mal ıelerine keltirgen shyǵyn kólemi mıllıon teńgeden asady, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, Jaqsy aýdandyq PB qyzmetkerleri Aqmola oblysynyń Jaqsy, Jarqaıyń jáne Esil aýdandary aýmaǵynda mal urlyǵymen aınalysqan qylmystyq top múshelerin anyqtap, ustaǵan. Belgili bolǵandaı, barymtashylar tobyna 6 adam kirgen. Olardyń barlyǵy Jarqaıyń aýdanynyń turǵyndary, tórteýi maldy urlasa, ekeýi etin satyp otyrǵan.
«Tergeý amaldary kezinde anyqtalǵandaı, aǵymdaǵy jyldyń tamyz aıynda kúdiktiler qoradan maldy shyǵaryp, aıdap áketken. Ustalǵan adamdar Jaqsy aýylynyń turǵynynyń asyl tuqymdy jylqylaryn urlaǵany úshin kúdikke alynǵan. Zardap shegýshi shyǵyn kólemin 1 mıllıon teńgege baǵalap otyr. Jalpy, polıtsııaǵa 13 adam júgingen. Olardyń 40 bas malyn urlaǵan, onyń ishinde 2 jylqy, 4 bas iri qara jáne 34 qoı-eshki. Mundaǵy mal ıelerine keltirilgen shyǵyn kólemi 50 myń teńgeden 1,5 myń teńgege deıin ,-dedi vedomstvodan.
Qazirgi kezde, qylmysyq toptyń barlyq múshesi ustalyp, ústerinen QR QK 188 baby boıynsha sotqa deıingi tergeý amaldary júrgizilýde.
Aıta keteıik, 2019 jyldyń 18-22 jeltoqsan aralyǵynda oblys aýmaǵynda «Mal urlyǵy» jedel aldyn alý sharasy ótip jatyr. Sharanyń alǵashqy eki kúninde 130 kólik tekserilip, mal jáne et ónimderin ruqsat qujatsyz tasymaldaýdyń 15 oqıǵasy anyqtaldy. Sonymen qatar shaǵyn bazar, et kombınaty jáne shujyq tsehtary aýmaǵy tekserilýde. Urlanǵan 22 mal zańdy ıesine qaıtaryldy.
