Aqmola oblysynda balalardy shańǵy sportyna baýlyǵan jattyqtyrýshy esirtkimen ustaldy

ASTANA. QazAqparat - Shańǵy sportynyń jattyqtyrýshysy Aqmola oblysynyń aýmaǵynda gashıshti zańsyz ótkizgeni úshin ustaldy. Zańsyz aınalymnan 55 keli esirtki tárkilendi, – dep habarlaıdy Polisia.kz.

Uzaq merzimdi jedel jumys barysynda Aqmola oblysy PD esirtki qylmysyna qarsy is-qımyl basqarmasynyń qyzmetkerleri oblystyq prokýratýramen kelisý jáne QR Qarjy monıtorıngi agenttiginiń qoldaýymen «Qarasora – 2023» respýblıkalyq jedel-profılaktıkalyq is-sharasy sheńberinde Astana men oblys aýmaǵyna esirtki quraldaryn jetkizý arnasyn jabý boıynsha arnaıy operatsııa júrgizdi. Qabyldanǵan sharalardyń nátıjesinde Aqmola oblysynyń esirtkige qarsy polıtseıleri Jibek Joly kentiniń termınalynyń janynda Astana qalasynyń 37 jastaǵy turǵyny, oblys aýdandarynyń biriniń týmasy basqarýyndaǵy avtokólikti toqtatty. Sol tulǵa balalarǵa shańǵy sportyn úıretýmen aınalysqan.

Kúdiktiniń avtokóligin sanktsııalanǵan tintý barysynda bagaj bóliginde karton qorap tabyldy, onyń ishinde salmaǵy 40 kelige jýyq gashısh esirtki zaty bar tórt polıetılen paket tabylyp, tárkilendi. Sol kúni elorda mańyndaǵy aýdanda, óz úıinde esirtki zattarynyń taǵy bir kóterme saýdageri, 36 jastaǵy er adam ustaldy.Sol úıdi sanktsııalanǵan tintý kezinde garajdyń úı-jaıynan salmaǵy 15 keliden astam esirtki zaty bar eki polıetılen paketi tabylyp, tárkilendi. Ustalǵandarǵa qatysty qamaýda ustaý túrindegi bultartpaý sharasy tańdaldy.