Aqmola oblysynda balalar arasynda taı úıretýden jarys ótti

KÓKShETAÝ. QazAqparat - Aqmola oblysynda Naýryz meıramyn merekeleý aıasynda «Taı - atqa, at - muratqa jetkizer» atty balalar arasynda taı úıretýden jarys ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.

Elbasynyń «Rýhanı Jańǵyrý» men «Uly Dalanyń jeti qyry» maqalalyq baǵdarlamasyn júzege asyrý jáne «Atqa minýdi» nasıhattaý sheńberinde Bulandy aýdanynyń Jańatalap aýylynda uıymdastyrylǵan sharaǵa aýdan ákimi Jomart Núrkenov qatysyp, quttyqtaý sóz sóıledi.

«Jarys qorytyndysy boıynsha «Jabaǵy úıretýden» Makınsk qalasynan kelgen mektep oqýshysy Ermek Dáýlet jabaǵynyń ústinde 2 mınýt 31 sekýnd qulamaı otyrǵany úshin birinshi oryn aldy.

«Aýdaryspaq» jáne «Jilik syndyrý» tárizdi ulttyq oıyndarda Jańatalap aýyly men Amangeldi selolyq okrýginiń turǵyndary Rústem Ábdikárimov pen Jangeldi Takaraev úzdik atandy.

Al «Kókpar» oıynynda Jańatalap aýylynyń bilekti jigitterine qarsy keletin komanda bolǵan joq», dep habarlady vedomstvo.

Jeńimpazdar baǵaly syılyqtarmen jáne maqtaý qaǵazdarymen marapattaldy.