Aqmola oblysynda balaǵa dórekilik tanytqan tárbıeshige qatysty is qozǵaldy

KÓKShETAÝ. QazAqparat - Aqmola oblysynyń Şýche qalasyndaǵy balabaqshada balaǵa dórekilik tanytqan tárbıeshisiniń áreketine qatysty tekseris júrip jatyr, dep habarlaıdy QazAqparat tilshisi.

Oqıǵa Şýche qalasyndaǵy balabaqshalardyń birinde oryn alǵan. Bul týraly áleýmettik jelide beınejazba jarııalandy. Onda tárbıeshisi otyrǵan balanyń astyndaǵy oryndyǵyn tartyp alady, keıin uıyqtap jatqan tóseginen turǵyzyp, súırep alyp ketedi. Ári qaraı ne bolǵany belgisiz.

«Osy oqıǵaǵa baılanysty tekseris júrgiziledi. Qazirgi kezde tárbıeshisi jumystan shettetildi. Tekseris qorytyndysy boıynsha tıisti sheshim qabyldanady», - dedi oblystyq bilim basqarmasy.

Sonymen qatar, Polıtsııa departamenti tárbıeshige qatysty is qozǵalǵanyn jetkizdi.

«Kámeletke tolmaǵandardy qadaǵalaýdy júzege asyrýǵa mindetti tárbıe mekemesi qyzmetkeriniń is-áreketin, sondaı-aq, Şýchınsk qalasynyń turǵynynan kelip túsken ótinishti nazarǵa ala otyryp, Býrabaı aýdanynyń polıtsııa bólimi QR QK 140-babynyń 2-bóligi «kámeletke tolmaǵandy tárbıeleý jónindegi mindetterdi oryndamaý» boıynsha sotqa deıingi tergeý sharalaryn bastady», - dedi vedomstvodan.