Aqmola oblysynda balabaqshalardaǵy as máziri sanıtarlyq talaptarǵa saı bolmaǵan - prokýratýra
Vedomstvonyń málimetinshe, Býrabaı aýdanynyń prokýratýrasy 2021-2022 jyldary jáne osy jyldyń ótken kezeńinde mektepke deıingi uıymdarda balalardy tamaqtandyrý jaǵdaılaryna qoıylatyn sanıtarııalyq-epıdemıologııalyq talaptardyń saqtalýyna taldaý júrgizildi.
Sanıtarlyq erejeler (Densaýlyq saqtaý mınıstriniń 2021 jylǵy 9 shildedegi №DSM-59 buıryǵy) boıynsha mektepke deıingi uıymdarda tamaqtaný ratsıonyna qoıylatyn negizgi talaptar, atap aıtqanda tańǵy as, ekinshi tańǵy as, tústen keıingi taǵamdar men keshki as quramy bekitilgen.
«Aýdandaǵy balabaqshalardyń as mázirin zerdeleý barysynda 1 695 bala baratyn mekemede balalardyń tamaqtaný jaǵdaılaryna qoıylatyn sanıtarlyq talaptardyń buzylýy, onyń ishinde túski asqa qaınatylǵan jáne jańa pisken kókónisterden turatyn salattar berilmegeni anyqtaldy. Budan basqa, sanıtarlyq erejelerge sáıkes keshki as kókónis (súzbe) taǵamynan nemese botqadan turady; negizgi ekinshi taǵam (et, balyq nemese qus eti), sýsyn (shaı, shyryn, kompot jáne jele). Ekinshi keshki as retinde qosymsha jemister nemese ashytylǵan sút ónimderi men toqashtar nemese kremsiz kondıterlik ónimder qosylady. Alaıda, keıbir balabaqshalarda keshki asqa joǵaryda atalǵan taǵamdardyń tizimine kirmeıtin taǵamdar usynyldy. Sonymen qatar, balalarǵa ekinshi tańǵy asta shyryn nemese jemis berildi, al ereje boıynsha shyryn men jemisti birge berý kerektigi kórsetilgen», - dedi vedomstvodan.
Prokýrorlyq qadaǵalaý aktisi boıynsha, aýdannyń barlyq balabaqshasyndaǵy as máziri sanıtarlyq erejelerdiń talaptaryna sáıkes keltirildi. Laýazymdy tulǵalar tártiptik jaýapqa tartylyp, sol arqyly 1 695 balanyń quqy qorǵaldy.
Aıta ketsek, budan buryn Aqmola oblysynda balalardyń jazǵy demalysy qalaı uıymdastyrylatyny týraly jazǵan edik.
