Aqmola oblysynda azyq-túlik baǵasynyń ósý sebepteri ataldy

KÓKShETAÝ. QazAqparat – Aqmola oblysy boıynsha ınflıatsııa jyl basynan beri 7,6 paıyzdy qurady, onyń ishinde azyq – túlik ınflıatsııasy -7,5 paıyzy. Jýrnalıstermen ótken brıfıngte Aqmola oblysynyń kásipkerlik jáne týrızm basshysy Erbol Ospanov óńirde azyq-túlik baǵasynyń ósý sebepterin atady, dep habarlaıdy QazAqparat tilshisi.

Basqarma basshysynyń aıtýynsha, jyl basynan beri óńirde áleýmettik mańyzy bar azyq-túlik taýarlarynyń baǵasy orta eseppen 3,9 paıyzǵa ósken.

«Ósýdiń negizgi sebepteri – óndiriske, janar - jaǵarmaıǵa, tehnıkaǵa jáne onyń qosalqy bólshekterine, jabdyqtar men jınaqtaýyshtarǵa, sondaı-aq veterınarııalyq preparattarǵa, premıksterge shyǵyndardyń ulǵaıýyna baılanysty bolyp otyr», - deıdi Erbol Ospanov.

Basqarma basshysy atap ótkendeı, oblysta ınflıatsııa qarqynyn tejeý maqsatynda ónim óndirý kólemin ulǵaıtýdy, syrtqy saýdany retteýdi, monopolııaǵa qarsy den qoıýdy kózdeıtin 2023-2024 jyldarǵa arnalǵan ınflıatsııany baqylaý jáne tómendetý jónindegi sharalar kesheni iske asyrylýda.

«Sońǵy jyldary baǵany turaqtandyrý úshin oblystyq bıýdjetten 4,3 mıllıard teńge, onyń ishinde «aınalym shemasyna» 3,6 mıllıard teńge bólindi. «Aınalym shemasy» sheńberinde tikeleı taýar óndirýshilerge taýarlardyń 10 túri boıynsha – jumyrtqa, qant, kartop, 1-shi surypty un, kúnbaǵys maıy, taýyq eti, sút, aıran, súzbe, sary maı boıynsha 2,5 mıllıard teńgege zaım berildi. Jalpy, oblysta baǵa men ınflıatsııanyń ósýin tejeý boıynsha jumysty jalǵastyra beremiz», – dep tolyqtyrdy Erbol Ospanov.

Aıta ketsek, budan buryn aqmolalyq dıqandar egin oraǵyna kiriskenin jazǵan edik.