Aqmola oblysynda azyq-túlik baǵasyn turaqtandyrý sharalary qolǵa alyndy

KÓKShETAÝ. QazAqparat – Aqmola oblysynda áleýmettik mańyzy zor azyq-túlik baǵasynyń ósýine jol bermeý jáne turaqtandyrý boıynsha tıisti jumystar júrgizilýde, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.

Oblystyq kásipkerlik jáne ónerkásip basqarmasynyń málimetinshe, óńirde áleýmettik mańyzy zor azyq-túlikti turaqtyrý boıynsha Jol kartasy qurylyp, baǵaǵa kún saıyn monıtorıng júrgizilip otyrady, kásipkerlermen memorandýmǵa qol qoıylyp jatyr.

«Esil» áleýmettik kásipkerlik korporatsııasy» aktsıonerlik qoǵamy basqarma tóraǵasynyń orynbasary Gúlmıra Djazınanyń aıtýynsha, Kókshetaý qalasynda 3 shaǵyn bazardyń qurylysyn júrgizý josparlanǵan.

«Esil» áleýmettik kásipkerlik korporatsııasynyń basty qyzmetiniń biri – Aqmola oblysynda turaqtandyrý qoryn ashý arqyly áleýmettik mańyzy zor azyq-túlik taýarlarynyń baǵasyn turaqtandyrý. Bul óńirde astyqtan basqa negizgi azyq-túlik baǵalarynyń maýsymdyq aýytqýyn retteıdi. Turaqtandyrý qoryna aqsha oblystyq bıýdjetten bólinedi», - dedi Gúlmıra Djazına.

Sonymen qatar, jergilikti taýar óndirýshiler tarapynan oblys ortalyǵyndaǵy «Qamqor» kommýnaldyq pavılonyna jáne «Bakaleıa» saýda úıine jeńildetilgen baǵamen jumyrtqa jetkizilýde.

Ótken jyldyń jeltoqsan aıynda «Qamqor» kommýnaldyq bazarynda «Esil» áleýmettik kásipkerlik korporatsııasynyń jańa pavılony ashyldy. Onda qala turǵyndary jeńildetilgen baǵamen azyq-túlik satyp alady.

Budan bólek, «Aqsaı nan-Kókshetaý» JShS áleýmettik nan jetkizý boıynsha aýqymdy jumystar júrgizilýde. Búgingi tańda Kókshetaý qalasynda 11 saýda orny, oblys boıynsha 185 saýda orny jumys isteıdi. Bul saýda oryndarynda salmaǵy 550 gramm áleýmettik nannyń baǵasy 75 teńge turady. Ákimdik pen nan zaýyty arasyndaǵy kelisim negizinde fırmalyq saýda oryndarynda nanyń baǵasy 90 teńgeden 80 teńgege deıin arzandatyldy.