Aqmola oblysynda azyq-túlik baǵasy qalaı turaqtandyrylýda
Kásipkerlik jáne týrızm basqarmasy basshysynyń orynbasary Jaslan Aıdrahmanovtyń málimetinshe, jyl basynan beri óńirde áleýmettik mańyzy bar taýarlarǵa baǵa ındeksi 1,6 paıyzdy qurady, bul ortasha respýblıkalyq kórsetkishten aspaıdy. Osy rette, áleýmettik mańyzy bar azyq-túlik ónimderiniń baǵasyn turaqtandyrý boıynsha júıeli jumystar júrgizilýde.
«Saýda ústemesiniń 15 paıyzdan asyp ketý jaǵdaılaryn anyqtaý maqsatynda kúndelikti baǵa monıtorıngi júrgiziledi. Tártip buzýshylarǵa eskertý túrindegi jaýapkershilik sharalary qoldanylýy, aıyppul sanktsııalary kózdelýi múmkin ekenin eske salamyn. Monıtorıngti taldaýdy Memleket basshysynyń tapsyrmasy boıynsha qurylǵan ákimdik janyndaǵy komıssııa júzege asyrady. Oǵan azyq – túlik taýarlarynyń baǵa belgileý tizbegi boıynsha kásiporyn basshylary qatysady. Bul aýyl sharýashylyǵy taýaryn óndirýshiler, qaıta óńdeý ónerkásibi, kóterme jáne bólshek saýda salasyndaǵy kásipkerler. Nátıjesinde saýda jelilerine taýarlardy tikeleı jetkizý jolǵa qoıylady, ónimsiz deldaldardyń býyndary alynyp tastalady», - dep atap ótti Jaslan Aıdrahmanov.
Áleýmettik-kásipkerlik korporatsııasynyń tórt áleýmettik dúkeni arqyly «aınalym shemasy» boıynsha jasalǵan sharttar sheńberinde óńirlik turaqtandyrý qorynan taýarlardy jetkizý jáne ótkizý turaqty júzege asyrylýda.
Oblysta barlyǵy 5,9 myń tonna kóleminde taýar qory qalyptastyryldy, onyń ishinde ÁKK turaqtandyrý qorynda - 791 tonna, forvardtyq sharttar sheńberinde – 2,7 myń tonna, «aınalym shemasy» sheńberinde - 2,5 myń tonna bar.
Aıta ketsek, áleýmettik mańyzy bar azyq-túlik taýarlarynyń 19 túriniń 12 túrin jergilikti aýyl sharýashylyǵy taýaryn óndirýshiler shyǵarady. Bul nan, un, sıyr eti, taýyq eti, sút, aıran, súzbe, maı, taýyq jumyrtqasy, kúnbaǵys maıy, sábiz, kartop sııaqty taǵamdar. Qalǵan taýarlarǵa degen qajettilik respýblıkanyń basqa óńirlerinen jáne jaqyn shet elderden jetkizilimdermen qamtamasyz etiledi.
