Aqmola oblysynda aımaqtyq ólketanýshylar forýmy ótti
KÓKShETAÝ. QazAqparat - Aqmola oblysynda el Táýelsizdiginiń 30 jyldyǵyna arnalǵan «Týǵan ólkem – tuǵyrym» atty ólketanýshylardyń óńirlik forýmy ótti, dep habarlaıdy QazAqparat tilshisi oblystyń ishki saıasat basqarmasynyń baspasóz qyzmetine silteme jasap.
Shara ǵylymı qoǵamdastyqty, shyǵarmashylyq mamandyq ókilderin, ǵalymdardy ólketaný salasyndaǵy aǵartý, ólketanýdaǵy izdeý, ǵylymı-zertteý jumystaryn jandandyrý, ólketaný jumysynda tájirıbe almasý jáne ǵylymı zertteýler ádistemesin jetildirý maqsatynda ótkizildi.
Forýmǵa qatysýshylardy quttyqtaǵan aımaq basshysynyń orynbasary Aına Mysyrálimova atalǵan is-sharany ótkizýdiń mańyzdylyǵyn atap ótti.
«Forým el Táýelsizdiginiń 30 jyldyǵynda ótkizilip otyr. Turǵyndardyń, birinshi kezekte jastardyń óz otanynyń tarıhyna degen qyzyǵýshylyǵyn jandandyrý óskeleń urpaqty patrıottyq tárbıeleýdegi mańyzdy baǵyt bolyp tabylady. Búginde tarıhı-ólketaný ekspedıtsııalarynyń, murajaı alańdarynyń múmkindikterin belsendi paıdalaný, úzdik jobalardy granttarmen yntalandyrý, zertteý nátıjelerin tsıfrlandyrýmen aınalysý qajet. Forým oblystyń mádenı ómirindegi mańyzdy oqıǵa, sondaı - aq tıimdi kásibı dıalog pen tájirıbe almasý úshin jaqsy alań bolatynyna senimdimin», - dep atap ótti óńir basshysynyń orynbasary.
Sharada óńirde ólketanýdyń qalyptasýy men damý baǵyttary týraly qoǵam qaıratkeri, Qazaqstan tarıh akademııasynyń akademıgi, «Abylaı hannyń qara joly» ekspedıtsııasynyń jetekshisi Murat Ydyrysov, ólketanýshy, muraǵat qyzmetiniń ardageri Gúlbarshyn Salyq, ólketanýshy Pavel Kosovıch, Shoqan Ýálıhanov atyndaǵy Kókshetaý ýnıversıtetiniń doktoranty Talapker Ýálıev baıandama jasady.
Forým aıasynda mádenıet mekemeleriniń qyzmetkerlerin marapattaý rásimi ótti. Kóp jylǵy eńbegi men osy salany damytýǵa qosqan úlesi úshin Atbasar tarıhı-ólketaný mýzeıiniń meńgerýshisi Anar Іlııasova, Stepnogor tarıhı-ólketaný mýzeıiniń meńgerýshisi Maıra Nurjanova «Mádenıet salasynyń úzdigi» tós belgisimen, ólketanýshy Gúlbarshyn Salyq jáne mýzeı qorynyń saqtaýshysy Gúláıim Ágýbaeva Aqmola oblystyq tarıhı-ólketaný mýzeıiniń negizin qalaýshy Hohlov atyndaǵy medalmen marapattaldy.
Shara sońynda qatysýshylar úshin oblystyq tarıhı-ólketaný murajaıynyń zaldary boıynsha ekskýrsııa ótkizildi.
