Aqmola oblysynda áıel tanysynyń úıin órtep jiberdi
KÓKShETAÝ. QazAqparat – Aqmola oblysynda 52 jastaǵy áıeldiń tanysynyń úıin órtep jibergeni anyqtaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 30 mamyrda Aqkól aýdandyq PB kezekshilik bólimine 31 jastaǵy áıelden Aqkól qalasyndaǵy úıin bireýlerdiń órtep jibergeni týraly aryz tústi. Úı ıesine keltirilgen shyǵyn kólemi 2 mıllıon teńge dep baǵalandy.
«Jedel izdestirý sharasy kezinde tártip saqshylary 52 jastaǵy áıeldiń atalmysh úıdi órtegenin anyqtady. Qylmys kezinde úıde eshkim bolǵan joq. Qaskóı zardap shegýshimen aradaǵy ózara kıkiljiń úshin úıdi órtegen», - deıdi vedomstvodan.
Vedomstvodan atap ótkendeı, qazirgi kezde kúdiktige qatysty QR QK 202-babynyń 2-bóligi boıynsha sotqa deıingi tergeý amaldary júrgizilýde.
