Aqmola oblysynda aıazda jolda qalǵan jolaýshylar qutqaryldy
KÓKShETAÝ. QazAqparat - Aqmola oblysynda aıazda jolda qalǵan júrgizýshiler men jolaýshylar qutqaryldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, óńirde aýa raıyna baılanysty kólik qozǵalysyna shekteý engizildi. Naqtyraq alǵanda, dızel otyny bar avtokólikter úshin eldi mekenderden tys jerlerge shyǵýǵa tyıym salyndy. Polıtsııa tarapynan aıazǵa baılanysty tótenshe jaǵdaılardy boldyrmaý úshin patrýldik jáne joldarǵa monıtorıng júrgizý jumystary kúsheıtildi. Oblysta 257 jylytý pýnkti jumys isteıdi, oǵan aýa raıynyń qolaısyzdyǵynan jolda qalǵan adamdar jetkizilýde.
«Ótkizilgen is-sharalardyń arqasynda oblysta tótenshe jaǵdaılarǵa jol berilgen joq. Alaıda, aıadan kóligi isten shyǵyp, jolda qalǵan alty adamǵa polıtsııa kómekke keldi. Máselen, PD JPQB patrýldik polıtsııa rotasynyń qyzmetkerleri polıtsııa leıtenanty Ǵanı Ábdýálıev pen polıtsııa aǵa leıtenanty Jasulan Shpekbaev «Nur-Sultan – Pavlodar» avtojolynyń 145 shaqyrymynda «Mercedes» avtokóligin baıqaǵan. Polıtsııa qyzmetkerleri júrgizýshi men jolaýshylardy Ereımentaý qalasyndaǵy qonaqúıge apardy, kólikti de qonaq úı turaǵyna jetkizdi», - deıdi vedomstvodan.
Budan bólek, aıazda isten shyqqan «Leksýs» avtokóligine kómek kórsetilgen.
Osyǵan baılanysty polıtseıler júrgizýshilerge óte muqııat bolýǵa, aýa temperatýrasy tómendegen kezde jolǵa shyqpaýǵa keńes beredi.
