Aqmola oblysynda aıazda isten shyqqan avtobýstan 100-ge jýyq shetel azamaty qutqaryldy
KÓKShETAÝ. QazAqarat - Aqmola oblysynda aıazdyń saldarynan sheteldikter otyrǵan avtobýs isten shyǵyp, jolaýshylarǵa shuǵyl kómek kórsetildi, dep habarlaıdy QazAqparat tilshisi.
ІІD baspasóz qyzmetiniń málimeti boıynsha qatty aıazǵa baılanysty oblysta tártip saqshylary kúsheıtilgen rejımde jumys isteýde. Bir táýliktiń ishinde polıtseıler jolaýshylarǵa lyq toly úsh avtobýsqa kómek kórsetti.
«21 qańtar kúni túngi saǵat 23:45-ter shamasynda «Astana-Petropavl» tasjolynyń boıynda «Petropavl - Saryaǵash» baǵytyndaǵy «Van Hool» atobýsynyń dızel otyny aıazdan qatyp qalǵan. Sol kezde, kólik ishinde 43 adam otyrǵan. Onyń ishinde eki júrgizýshi Ońtústik Qazaqstan oblysynyń turǵyndary da, qalǵany Ózbekstan Respýblıkasynyń azamattary. Atalmysh jolda kezekshilik jasap júrgen tártip saqshylary men qutqarýshylar avtobýsqa kómekke kelip, júrgizýshisi men jolaýshylaryn Shortandy aýdanynyń Bozaıǵyr aýylyndaǵy kásiptik tehnıkalyq ýchılışesine jaıǵastyrdy. Oǵan qosa, ystyq tamaq berilip, túneıtin orynmen qamtamasyz etildi.
Sonymen qatar, «Kókshetaý-Astana» tasjolynyń boıynda 10 jolaýshysy bar «Hıýndaı stareks» shaǵyn avtobýsynyń dızel otyny qatyp, isten shyqqan. Bul joly atalmysh kólik jolaýshylary ózge kólikterge otyrǵyzylyp saparlaryn odan ári jalǵastyrdy.
Al, 21 qańtar kúni túngi saǵat 01:50-ler shamasynda Bulandy aýdanynyń Makınsk qalasy mańynda «Merke-Túmen» baǵytyndaǵy «Setra» reıstik avtobýsy da synyp jolaýshylar joldan qalǵan. Bul jolaýshylar avtobýsynyń ishinde 55 jolaýshy men 2 kólik júrgizýshisi bolǵany anyqtaldy. Jolaýshylardyń barlyǵy Tájikstan Respýblıkasynyń azamattary. Olardyń barlyǵy Makınsk qalasyna jetkizilip, ystyq tamaq jáne túneıtin orynmen qamtamasyz etildi, dep túsindirdi baspasóz qyzmetindegiler.
