Aqmola oblysynda «Aýyldyń gúldenýi – Qazaqstannyń gúldenýi» marafony jalǵasýda

KÓKShETAÝ. QazAqparat - Aqmola oblysynda Táýelsizdiktiń 30 jyldyǵyna arnalǵan «Aýyldyń gúldenýi – Qazaqstannyń gúldenýi» marafony aýyldyq okrýgterde jalǵasýda. Joba sheńberinde Tselınograd aýdanynda túrli is-sharalar ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Jańaesil jáne Nuresil aýyldyq okrýgterinde aýyldardyń jetistikterin kórsetý boıynsha saltanatty jınalystar uıymdastyryldy. Oǵan eńbek ardagerleri, aýyldardyń, kentterdiń eńbekkerleri, agroónerkásiptik keshenniń ozattary qatysty.

Qatysýshylar men qonaqtar úshin jergilikti taýar óndirýshilerdiń aýyl sharýashylyǵy ónimderiniń kórmeleri, fotogalerııalary, jármeńkeleri uıymdastyryldy.

Aýdandyq ishki saıasat bóliminiń málimetinshe, turǵyndar aýyldar men kentter tarıhyndaǵy qyzyqty oqıǵalarmen, halyqtyq qolóner elementterimen tanysyp, jańa, sapaly et, sút jáne jemis-kókónis ónimderin, bal, kondıterlik ónimder, kókónis tuzdyqtary, jıdek djemi jáne basqa da azyq-túlik ónimderin arzan baǵamen satyp aldy.

Qatysýshylardy quttyqtaı otyryp, aýdan ákiminiń orynbasary Alma Aıtqojınova eńbek ardagerlerine aýyldyq eldi mekenderdiń áleýmettik-ekonomıkalyq damýyna qosqan eleýli úlesi úshin alǵys bildirdi.

«Sizderdiń eńbekterińizben bizdiń rýhanı jáne materıaldyq baılyǵymyz jasaldy, ónerkásip, aýyl sharýashylyǵy damydy, tyń jerler ıgerildi. Sizder Táýelsiz Qazaqstan halqyna eńbektegi batyrlyqtyń, shynaıy patrıotızmniń, týǵan jerge degen súıispenshiliktiń kóptegen úlgisin kórsetken jasampazdardyń urpaǵysyzdar. Búgin de sizder aýdan ómirine belsene qatysyp, shette qalmaı kelesizder», - dep atap ótti aımaq basshysynyń orynbasary.

Іs-shara barysynda aýyl sharýashylyǵy salasynyń 40 ókili, sonyń ishinde óndiris ozattary, sharýa qojalyqtarynyń basshylary, kásiporyndar men mekemelerdiń qyzmetkerleri aýdan ákiminiń alǵys hattarymen jáne baǵaly syılyqtarmen marapattaldy.

Barlyq is-sharalar sanıtarlyq-epıdemıologııalyq normalardy saqtaı otyryp júrgizildi.