Aqmola oblysynda aýyldardy elektrmen jabdyqtaý máseleleri sheshimin tabýda
KÓKShETAÝ. QazAqparat - Aqmola oblysynyń ákimi Málik Myrzalın bekitken aqparattyq jumys kestesine saı óńirde oblys ákiminiń orynbasarlary, oblystyq basqarmalardyń jáne ekonomıkanyń ózge salalaryndaǵy basshylardyń halyq aldynda esep berýi jáne jeke qabyldaý formatynda «Ashyq esik» kúnderi ótýde. Osyndaı alańdar Tselınograd aýdanynyń Qaraótkel jáne Talapker aýyldarynda uıymdastyryldy, dep habarlaıdy QazAqparat tilshisi Aqmola oblysynyń ishki saıasat basqarmasyna silteme jasap.
Atalmysh eldimekender Astananyń irgesinde ornalasqandyqtan dálme dál jáne mekenjaı jumystary boıynsha kóp kóńil bólýdi qajet etedi.
Qabyldaýǵa kelgen turǵyndar energııa jáne sýmen jabdyqtaý, aýylishilik kóshelerdi jóndeý, jedel medıtsınalyq qyzmet kórsetý, ýchaskelik polıtsııa qyzmetiniń, ekologııalyq jáne sanıtarlyq máselelerin kóterdi. Osy oraıda, turǵyndarǵa kóterilgen kóptegen máseleler boıynsha túsinikteme berilse, keıbirin jaýapty tulǵalar baqylaýyna alatyn boldy.
«Aǵymdaǵy jyly Qaraótkel aýylynda elektrmen jabdyqtaý boıynsha 87 shaqyrym elektr jelisi salyndy. Osynyń arqasynda aýyldaǵy 340 jańa úı jaryqqa qol jetkizdi. Oǵan, qosa, aýylda ekinshi kezeńde elektrmen jabdyqtaý jelisin salý boıynsha jer telimi rásimdelýde. Jyl sońyna deıin aýyldy sýmen qamtamasyz etý josparda bar.
Talapker aýylynda 1 200 abonentti elektr jelisine qosý kezeń kezeńmen júzege asyrylýda. Bıyl aýyl turǵyndaryn sýmen qamtamasyz etý boıynsha tartýshy jeliniń qurylysy bastaldy. Nysandy 2021 jyly aıaqtaý josparlanǵan.
Bıliktiń nazaryndaǵy taǵy bir ózekti másele ol osy aýyldaǵy joldyń jaǵdaıy, 6,6 shaqyrym jol salynyp, qarasha aıynda aıaqtaý josparda bar. Sonymen qatar, turǵyndardy tolǵandyrǵan 96-shy razezden shyǵa beristegi jolǵa baǵdarsham ornatý máselesi de oń sheshilýde», deıdi oblystyq ishki saıasat basqarmasyndaǵylar.
Qaraótkel aýlynyń aqsaqaly Amangeldi Qusaıynov uıymdastyrýshylarǵa alǵysyn bildirip, turǵyndar men bılik ókilderiniń betpe bet kezdesýin turaqty túrde ótkizip turý qajettigin atap ótti. Jalpy, jergilikti qoǵam ókilderi turǵyndardy qabyldaý sharasyna oń baǵasyn berdi.
Óz kezeginde Aqmola oblysynyń ákimi Aına Mysyrálimova osyndaı formatta aýyl turǵyndarymen kezdesý turaqty túrde ótkiziletinin aıtyp sendirdi. Shara sońynda óńirdiń áleýmettik-ekonmıkalyq damýyna eleýli úles qosqan Tselınograd aýdynynyń turǵyndary oblys ákimi orynbasarynyń Alǵys haty jáne estelik syılyqtarymen marapattaldy.
