Aqmola oblysynda aýyl sharýashylyǵyna bólingen qarajatty jymqyrǵan sheneýnik kúdikke ilindi

KÓKShETAÝ. QazAqparat - Aqmola oblysynda laýazymdy tulǵa aýyl sharýashylyǵyn qoldaýǵa bólingen bıýdjet qarajatyn jymqyrdy degen kúdikke ilindi. Bul týraly Aqmola oblysy boıynsha Sybaılas jemqorlyqqa qarsy is-qımyl departamentinde aıtyldy, dep habarlaıdy QazAqparat tilshisi.

Onlaın kezdesýge 124 ókilden turatyn Mınıstrliktiń vedomstvolyq baǵynysty mekemeleri men kásiporyndarynyń basshylyǵy da qatysty.

Qatysýshylar kásiporyn dırektoryna jáne basqa tulǵalarǵa qatysty bıýdjet qarajatyn jymqyrý faktisi boıynsha qylmystyq is aıasynda (QR QPK 200-babynyń negizinde engizilgen) usynýdy qarady.

Atap aıtqanda, sotqa deıingi tergeý barysynda aýyl sharýashylyǵy salasynda mamandanǵan uıymnyń basshysy júıeli negizde basqa adamdarmen birge memlekettik baǵdarlamany iske asyrý sheńberinde agrarlyq ǵylymdy qamtamasyz etýge bólingen bıýdjet qarajatyn jymqyrý áreketterin jasaǵany anyqtaldy.

Qylmystyq qýdalaý organynyń qorytyndysyna sáıkes quqyq buzýshylyq jasaýǵa yqpal etken mán-jaılar joǵary turǵan mekeme tarapynan vedomstvolyq baǵynysty uıymnyń qyzmetine tıisti baqylaýdyń bolmaýy jáne laýazymdy tulǵalardyń normatıvtik quqyqtyq aktilerdiń talaptaryn óreskel buzýy boldy.

Osyǵan uqsas faktilerdi boldyrmaý maqsatynda kináli tulǵalarǵa qatań tártiptik sıpattaǵy sharalardy qabyldaý, baǵynyshtylardyń tártibi men qyzmetine baqylaýdy kúsheıtý, qyzmetkerler arasynda tıisti aldyn alý jumysty uıymdastyrý, vedomstvolyq baǵynysty uıymdardyń birinshi basshylary úshin sybaılas jemqorlyqqa qarsy shekteýlerdiń talaptaryn ázirleý jáne bekitý, sondaı-aq sybaılas jemqorlyq táýekelderine ishki taldaýdy ýaqtyly jáne sapaly júrgizý usynyldy.

Oblystyq Sybaılas jemqorlyqqa qarsy qyzmetiniń basshysy Murat Tóleýbaev kezdesý qatysýshylarǵa Memleket basshysy bekitken sybaılas jemqorlyqqa qarsy is-qımyl máseleleri boıynsha zańnamaǵa engizilgen túzetýlerdi túsindirdi.

«Ókinishke oraı, bıylǵy jyly aýyl sharýashylyǵy salasyndaǵy sybaılas jemqorlyq quqyq buzýshylyqtardyń ótken jyldyń sáıkes kezeńimen salystyrǵanda ósýi baıqalady. Memleket jyl saıyn kóp bıýdjet qarajatyn bóletinine qaramastan, josyqsyz adamdardyń sybaılas jemqorlyq áreketteri aýyl sharýashylyǵy salasynyń damýyn aıtarlyqtaı tejeıdi. Sondyqtan, basshylardy sybaılas jemqorlyqqa qarsy is - qımyl boıynsha aldyn alý jumysyn jáne baǵynyshtylardyń qyzmetine baqylaýdy kúsheıtýge shaqyramyn», -dep qorytyndylady Murat Tóleýbaev.