Aqmola oblysynda aýyl sharýashylyǵy salasynyń ozattary marapattaldy

Saltanatty sharaǵa jınalǵan qurmetti qonaqtardyń arasynda Sotsıalıstik Eńbek Erleri - Esilbaı Qadyralın, Saǵıla Esenjolova, Valentın Şerbakov boldy. «Sizderdiń Otanǵa degen súıispenshilikterińiz ben qajyrly eńbekterińiz bizdiń oblysymyzdyń ǵana emes, barlyq elimizdiń aýyl sharýashylyǵyn damytýǵa qomaqty úles qosty. Biz sizderdi maqtan etemiz, qurmetteımiz, sizderden úlgi alamyz», – dedi Aqmola oblysynyń ákimi Ermek Marjyqpaev óziniń quttyqtaý sózinde. Óńir basshysy aýa raıynyń qolaısyzdyǵyna qaramastan dıqandar 5 mıllıon tonnadan asa astyq jınaǵanyn atap ótti. Astyq daqyldarynyń ónimdiligi boıynsha úzdik kórsetkishterge qol jetkizgen ujymdarǵa alǵysyn bildirdi. Bulardyń qatarynda Sandyqtaý, Zerendi, Shortandy, Jaqsy aýdandaryndaǵy «Svobodnoe», «Vıktorovskoe», «Jáken», «Aıbat» jaýapkershiligi shekteýli seriktestikteri sııaqty sharýashylyqtar bar. Oblysta «Rodına» agrofırmasy», «Eńbek», «Kamyshenka», «Esil Agro» jaýapkershiligi shekteýli seriktestikteri sút óndirisindegi dástúrli kóshbasshylar bolyp tabylady. Óńirde óndiriletin jumyrtqanyń 70 paıyzy «Ijevskıı» óndiristik kooperatıvi men «QazGerQus» JShS-niń úlesine tıesili. Makınsk qus fabrıkasyn iske qosýdyń nátıjesinde qus etiniń óndirisi 2 ese ósti. «Memleket basshysy Qasym-Jomart Toqaev bizdiń aldymyzǵa sýarmaly egistik jerlerin arttyrý, paıdalanylmaıtyn jaıylymdardy aınalymǵa engizý jáne organıkalyq ónimder óndirý mindetterin júktep otyr. Ol úshin bizdiń áleýetimiz jetkilikti. Aýyl turǵyndary elimizdiń ekonomıkasyn damytýǵa laıyqty úles qosa beretinine senimdimin», – dedi aımaq basshysy. Shara barysynda aýyl sharýashylyǵy salasynyń bir top úzdik qyzmetkeri «Eńbek ardageri» medali, «Aýyl sharýashylyǵy salasynyń úzdigi» tósbelgisimen marapattaldy.