Aqmola oblysynda aýyl sharýashylyǵy salasynyń ozattary marapattaldy
KÓKShETAÝ. QazAqparat - Aqmola oblysynda óńir basshysy Málik Myrzalınniń qatysýymen aýyl sharýashylyǵy eńbekkerleriniń kúni atalyp ótildi, dep habarlaıdy QazAqparat tilshisi.
«Kókshetaý» mádenıet saraıynda uıymdastyrylǵan sharaǵa oblystyń ár óńirinen kelgen 600 sharýa qatysty. Shara barysynda oblystyń osy ýaqytqa deıingi aýyl sharýashylyǵy, ónerkásip jáne áleýmettik tárizdi san alýan salalarda qol jetken jetistikteri pash etilgen kórme usynyldy. Sondaı-aq, saltanatty túrde aýyl sharýashylyǵy salasynyń eńbek ozattary marapattaldy.
Sharada aımaq basshysy aýyl sharýashylyǵy eńbekkerlerin kásibı merekelerimen quttyqtaı kele, eńbekterine tabys tiledi.
«Bizdiń aýyl eńbekkerleriniń qajyrly eńbeginiń nátıjesinde dándi daqyldardyń jalpy ónimi 5,1 mıllıon tonnaǵa jetti. Onyń 88 paıyzy joǵary sapaly bıdaı.
Oblys agroónerkásip kesheni qyzmetkerleri ózderiniń kásibı merekelerin laıyqty kórsetkishtermen qarsy alýda. Aımaqta jyl basynan beri 155 otbasylyq mal bordaqylaý alańy qurylyp, olarda 3 300 bas iri qara mal semirtilýde. 5 myń basqa arnalǵan asyl tuqymdy eshki sharýashylyǵynda ónim óndirýmen birge ony óńdeý jumystary da jolǵa qoıylǵan. Sondaı-aq, ettik jáne súttik baǵyttaǵy 35 aýyl sharýashylyǵy kooperatıvi jumys isteýde», - dedi aımaq basshysy óz sózinde.
Saltanatty shara jergilikti kórkem ónerpazdardyń kontserttik baǵdarlamasyna ulasty.
