Aqmola oblysynda aýyl sharýashylyǵy ónimderiniń óndirisi 5 paıyzǵa artty
Aqmola oblystyq aýyl sharýashylyǵy basqarmasynyń málimetinshe, óńirde barlyq túrdegi 106,5 myń tonnaǵa jýyq et (ósimi 10,2 paıyzǵa), 195 myń tonnadan astam sút jáne 363 mıllıon dana taýyq jumyrtqasy óndirildi. Memleket qoldaýynyń arqasynda bıylǵy egis naýqany ońtaıly agrotehnıkalyq merzimde ótkizildi. Paıdalanylmaı jatqan aýyl sharýashylyǵy jerlerin ıgerý esebinen jazdyq egis alqaby 5,3 mıllıon gektarǵa deıin ulǵaıtyldy, onyń 4,9 mıllıon gektary dándi jáne dándi-burshaq daqyldary.
Aýyl sharýashylyǵy daqyldarynyń ónimdiligi men sapalyq kórsetkishterin arttyrý maqsatynda óńirde agrotehnıkalyq sharalar júzege asyrylyp jatyr. Topyraqtyń qunarlylyǵyn jaqsartý úshin mıneraldy tyńaıtqyshtar qoldanylady. Bıylǵa josparlanǵan110 myń tonna tyńaıtqyshtyń 100 myń tonnasy satyp alyndy. Tyńaıtqysh engizý jumystary shilde-qazan aılarynda júrgiziledi. Sonymen birge, egistikti aramshópterden qorǵaý úshin oblys fermerleri 4,4 mıllıon gektar (jospardan 109,4 paıyz) alqapta hımııalyq óńdeý jumystaryn qolǵa aldy, onyń ishinde qosjarnaqty aramshópterge - 2,8 mıllıon gektar, dándi daqyldarǵa - 1,6 mıllıon gektar.
Budan bólek, qazirgi ýaqytta dándi daqyldar aýrýy (septorııa) jáne ósimdik zııankesteri (bıdaı trıpsi), sondaı-aq, shegirtkege qarsy is-sharalar júrgizilip jatyr.
«Jalpy, Memleket basshysynyń azyq-túlik qaýipsizdigin nyǵaıtý jónindegi tapsyrmalaryn oryndaý sheńberinde Aqmola oblysynda belgili bir nátıjelerge qol jetkizildi. Bıylǵy birinshi jartyjyldyq qorytyndysy boıynsha óńirde aýyl sharýashylyǵy óniminiń óndirisi 5 paıyzǵa, ıaǵnı 187,4 mıllıard teńgege deıin ulǵaıdy», - deıdi vedomstvodan.
Aıta ketsek, budan buryn Aqmola oblysynda sút óndirisin 32,3 myń tonnaǵa ulǵaıtý josparlanǵanyn jazǵan edik.
