Aqmola oblysynda aýyl sharýashylyǵy basqarmasynyń basshylary para alý kúdigine ilikti

NUR-SULTAN. QazAqparat - Aqmola oblystyq aýyl sharýashylyǵy basqarmasynyń laýazymdy tulǵalary para alý kúdigine ilikti. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Tergeý departamenti bastyǵynyń orynbasary Baýyrjan Balǵabekov aıtty, dep habarlaıdy QazAqparat tilshisi.

«Sybaılas jemqorlyqqa qarsy is-qımyl ulttyq bıýrosynyń Aqmola oblystyq departamenti oblystyq aýyl sharýashylyǵy basqarmasy bastyǵynyń orynbasary, osy basqarmaǵa qarasty jer sharýashylyǵy jáne astyq naryǵyn retteý bóliminiń bastyǵy jáne ózge de tulǵalarǵa qatysty sotqa deıingi tergeý amaldaryn júrgizip jatyr»,- dedi Baýyrjan Balǵabekov.

Onyń atap ótýinshe, atalǵan tulǵalar aldyn ala ymyralasyp, JShS ókilinen memlekettik baǵdarlama aıasynda sýbsıdııa alýǵa arnalǵan ótinimge oń sheshim shyǵaryp berý úshin 500 myń teńge kóleminde para alǵan. Tergeý amaldary júrip jatyr.

«Aıta keterligi, aǵymdaǵy jyldyń birinshi toqsanynda aýyl sharýashylyǵy salasynda 33 sybaılas jemqorlyq qylmysy tirkeldi. Onyń 19-y sotqa jiberilip, 4 tulǵa sottaldy», - dedi ol.