Aqmola oblysynda aýyl eńbekkerleri marapattaldy

KÓKShETAÝ. QazAqparat - Táýelsizdiginiń 30 jyldyǵyn merekeleý sheńberinde Aqmola oblysynda «Aýyldyń gúldenýi – Qazaqstannyń gúldenýi» marafony jalǵasýda. Bul rette, Esil aýdanynyń aýyldary men aýyldyq okrýgteri egemendik alǵan jyldary jetken jetistikterin kórsetýdi aýyl sharýashylyǵy jármeńkesin uıymdastyrýmen bastady, dep habarlaıdy QazAqparat tilshisi oblystyq ishki saıasat basqarmasyna silteme jasap.

«Aýyldyń gúldenýi – Qazaqstannyń gúldenýi» marafony Esil aýdanynyń Znamenka aýylynda jalǵasty. Bul kúni aýyl turǵyndary úshin jarqyn jáne merekelik kóńil kúıde boldy. Shara barysynda aýyl tarıhyna arnalǵan kórmeler uıymdastyryldy, aýdandyq mádenıet úıi ártisteriniń qatysýymen merekelik kontsert jáne aýyldyń eńbek sińirgen qyzmetkerlerine qurmet kórsetildi.

Sharada aýyl ákimi eńbek ardagerleri, aýyl eńbekkerleri, aýyl sharýashylyǵynyń ozattaryn quttyqtady.

«Kóp jyldar boıy óz kúsh-jigerin aıamaı, aýyl men aýdannyń ál-aýqatyn arttyrýǵa ules qosqan jerlesterimizge erekshe alǵysymdy bildiremin. Biz olardy maqtan tutamyz! B ul mereke-aýyldyń, mádenıettiń jáne tarıhtyń jandanýy. Bul bizdiń aýyl úshin óte mańyzdy oqıǵa. Biz barlyq jetistikter men oqıǵalardy bir kúnde biriktire aldyq «, – dedi Znamenka aýylynyń ákimi Rústem Birlesuly.

Aýyl turǵyndary merekelik baǵdarlamaǵa belsendi qatysty. Uıymdastyrýshylar dastarhan jaıyp jınalǵandarǵa merekelik kóńil-kúı syılady.

Osylaısha, Táýelsizdiktiń 30 jyldyǵy sheńberinde uıymdastyrylǵan aýyl merekesi joǵary deńgeıde ótti. Jas urpaq eńbek jáne tyń ıgerý ardagerlerimen jaqynyraq tanysty.

«Aýyldyń gúldenýi – Qazaqstannyń gúldenýi» marafonynyń basty ıdeıasy – aýylda turatyn barlyq halyqtardyń dostyǵy men baýyrlastyǵyn nyǵaıtý, turaqty áleýmettik-ekonomıkalyq damýdy saqtaý, aýyl sharýashylyǵyn damytý.

Shara sońynda belsendi aýyl turǵyndary Alǵys hat jáne gramotalarmen marapattaldy.