Aqmola oblysynda «Aýyl – el besigi» membaǵdarlamasy sheńberinde birqatar jobalar júzege asyrylýda
KÓKShETAÝ. QazAqparat – Aqmola oblysynda aýylda turý úshin qolaıly orta qurýǵa baǵyttalǵan «Aýyl – el besigi» memlekettik baǵdarlamasy aıasynda 41 joba júzege asyrylýda. 12 aýyldyq eldi mekende bilim berý, densaýlyq saqtaý, mádenıet, sport, turǵyn úı-kommýnaldyq sharýashylyq nysandary men joldardyń qurylysy men qaıta jańǵyrtylýy júrip jatyr, dep habarlaıdy QazAqparat tilshisi oblystyq ishki saıasat basqarmasyna silteme jasap.
Búgingi kúni 14 joba boıynsha jumystar aıaqtaldy. Onyń ishinde oblystyń alty aýdanyndaǵy joldardy ortasha jóndeý boıynsha 10 joba jáne bilim berý salasyndaǵy 4 joba bar. Naqtyraq aıtsaq, Atbasar aýdany Bastaý aýylynyń orta mektebin, Astrahan aýdany Jaltyr aýylynyń №4 orta mektebin kúrdeli jóndeý, Býrabaı aýdany Qyzylaǵash aýylynyń orta mektebiniń shatyryn qaıta jańartý jáne Sandyqtaý aýdany Balkashıno aýylynyń «Mıras» balabaqshasyn kúrdeli jóndeý jumystary bar. Endi balalar yńǵaıly jaǵdaıda oqyp, arnaıy kabınetterde – fızıka, hımııa, geografııa sııaqty pánderden bilim ala alady.
«Bizde 24 joba aıaqtalý satysynda. Osy aıdyń aıaǵynda Arshaly aýdanynyń aýdan ortalyǵynda dene shynyqtyrý-saýyqtyrý kesheniniń qurylysy aıaqtalady. Aı basynda Bulandy aýdany Kapıtonovka aýylynyń sý qubyry jelileri qaıta jańartyldy. Tórt eldi mekende jumystar jalǵasýda», - dep atap ótti ekonomıka jáne bıýdjettik josparlaý basqarmasyndaǵylar.
Jaqynda Krasnyı ıAr aýylyndaǵy joldardy jóndeý aıaqtaldy. Munda jumys osy jyldyń sáýir aıynda bastaldy. Merdiger «Kókshe AgroInvest» JShS boldy. Úsh aı boıy 24 kóshege asfalt tóseý úshin daıyndyq jumystary júrgizildi –qıyrshyq tas tóseý, sý ótkizý qubyrlary ornatyldy, jazdyń ortasynan bastap munda 14 shaqyrymǵa sozylǵan joldar jóndeldi. Mundaı jobalardy júzege asyrý kent turǵyndarynyń ómir sapasyna oń áser etedi.
Aıta keteıik, úsh joba kelesi jyly aıaqtalady, onyń ishinde Atbasar aýdanynyń Bastaý aýylynda jastardyń bos ýaqytyn ótkizý ortalyǵynyń, Tselınograd aýdanynyń Aqmol aýylynda DSK qurylysy jáne Krasnyı ıAr aýylynda jylýmen jabdyqtaýdyń syrtqy jelilerin jóndeý bar.
