Aqmola oblysynda aýyl balalaryn qoldaýǵa baǵyttalǵan «Myń bala» zııatkerlik olımpıadasy ótedi
Bul týraly óńirlik kommýnıkatsııalar qyzmetinde ótken brıfıngte «Aqmola daryny» daryndy balalar men daryndy jastardy anyqtaý jáne qoldaý ortalyǵy basshysynyń mindetin atqarýshy Aıagóz Aldabergenova málim etti, dep habarlaıdy QazAqparat tilshisi.
«Myń bala» ulttyq zııatkerlik olımpıadasy - aýyl balalaryn qoldaýǵa jáne damytýǵa, olardyń qalalyq qurdastarymen tabysty básekelesýi úshin jaǵdaı jasaýǵa, bilimdegi alshaqtyqty qysqartýǵa baǵyttalǵan ulttyq aýqymdaǵy biregeı joba. Ótken jyly olımpıadaǵa elimizde 4 myń aýyl mektebinen 300 myńǵa jýyq oqýshy qatysty.
«2021 jyly Aqmola oblysynan 6486 oqýshy 1-shi kezeńge qatyssa, onyń 263-i ekinshi kezeńge ótti. Nátıjesinde 51 oqýshy jeńimpaz atandy. Barlyq jeńimpazdarǵa ári qaraı bilim alý jáne daǵdylaryn damytý úshin «Birge Oqý» onlaın-mektebine tegin qoljetimdilik beriledi. Jeńimpazdarǵa konkýrstan tys daryndy balalarǵa arnalǵan mamandandyrylǵan mektepterge qabyldaý múmkindigi beriledi», - dedi Aıagóz Aldabergenova.
Bıylǵy olımpıada qorytyndysyna saı elimizde 1000 jeńimpaz anyqtalady. Olar elimizdiń respýblıkalyq fızıka-matematıka mektebi, «Bilim-ınnovatsııa» lıtseıi jáne «Daryn» mamandandyrylǵan mektepterinde oqýǵa múmkindik alady. Budan bólek, 5 myń oqýshy qosymsha sabaqtardy onlaın oqıtyn bolady.
«Myń bala» ulttyq zııatkerlik olımpıadasynyń maqsaty-aýyldyq jerlerdegi oqýshylardyń qabiletin damytý úshin teń jaǵdaı jasaý. Shalǵaı óńirlerden kelgen oqýshylardyń áleýetin qoldaý Qazaqstan Prezıdenti Qasym-Jomart Toqaev «Balalar jyly» dep jarııalaǵan 2022 jyl aıasynda odan da ózekti bola túsýde», - dep tolyqtyrdy Aqmola oblystyq bilim basqarmasy basshysynyń mindetin atqarýshy Botakóz Dúısenova.
Olımpıadaǵa Qazaqstannyń aýyldyq mektepterinde sońǵy eki oqý jylynda bilim alyp jatqan 5-6 synyp oqýshylary qatysa alady.
Eske sala ketsek, «Myń bala» zııatkerlik olımpıadasy eki kezeńnen turady. Birinshi kezeń 2022 jyldyń 4-8 sáýir aralyǵynda ótedi. Ekinshisi-27-29 sáýir aralyǵynda.
