Aqmola oblysynda «Aýyl Amanaty» baǵdarlamasy qalaı júzege asyrylýda

KÓKShETAÝ. QazAqparat - «Aýyl Amanaty» aýyl halqynyń tabysyn arttyrý baǵdarlamasyn iske asyrý sheńberinde aýyldyq eldi mekenderde jáne shaǵyn qalalarda nesıelendirý úshin bıyl Aqmola oblysyna 1,2 mıllıard teńge qarjy bólindi.

Osy rette 265 jańa jumys ornyn qura otyryp, 250-ge jýyq nesıe berý josparlanǵan. Nesıeniń ortasha mólsheri 4,8 mıllıon teńgeni quraıdy. Bul týraly jýrnalıstermen ótken brıfıngte Aqmola oblysy aýyl sharýashylyǵy jáne jer qatynastary basqarmasy basshysynyń orynbasary Qasym Itqusov málim etti, dep habarlaıdy QazAqparat.

Basqarma basshysy atap ótkendeı, bıylǵy jyldyń 27 maýsymynda senim bildirilgen agent «Kokshe» ÁKK» AQ-men tapsyrma sharty jasaldy.

Baǵdarlamany tıimdi oryndaý maqsatynda ár aýdanda ákimderdiń ókimderi jáne olardyń orynbasarlarynyń tóraǵalyǵymen jumys toptary quryldy, olar senim bildirilgen agenttiń qaraýyna odan ári joldaý úshin áleýetti qaryz alýshylardyń nesıelik qujatyn iriktep daıyndaıdy.

«Kokshe» ÁKK» AQ senim bildirilgen agent retinde baǵdarlamaǵa qatysýshylarǵa belgili bir sharttarmen (mıkrokredıt merzimi – 5 jylǵa deıin, mal sharýashylyǵy salasyndaǵy jobalar úshin mıkrokredıt merzimi – 7 jylǵa deıin; mıkrokredıttiń eń joǵary somasy – aýyldyq eldi mekenderde jáne shaǵyn qalalarda – 2,5 myń AEK-ke deıin (8 625 000 teńge), zákirlik kooperatsııany damytý úshin – 8 myń AEK-ke deıin (27 600 000 teńge); nomınaldy syıaqy mólsherlemesi – jyldyq 2,5%-dan aspaıdy; kepil qoıý; QR salyq zańnamasyna sáıkes salyq organdarynda tirkelý) nesıe beredi», - dedi Qasym Itqusov.

Maýsym aıynyń sońynda «Kokshe» ÁKK» AQ senim bildirilgen agenti úmitkerlerdiń ótinimderin qabyldaýdy bastady. Bul baǵdarlamaǵa aýyldyq eldi mekender men shaǵyn qalalardyń turǵyndary úmitker bola alady.

«Búgingi tańda jaǵdaı kelesideı: nesıeý alý úshin jalpy somasy 872 mıllıon teńgege 139 ótinim tústi. Onyń ishinde 348,7 mıllıon teńge somasyna 56 ótinim boıynsha nesıe mamandarynyń qorytyndysy daıyndalýda, 117,5 mıllıon teńge somasyna 19 ótinim nesıe komıtetimen maquldandy. Atbasar, Jaqsy, Arshaly aýdandarynda jáne Birjan sal aýdanynda júrgizilip jatqan belsendi jumystardy atap ótkim keledi», – dep tolyqtyrdy Qasym Itqusov.

Jalpy, aýyl sharýashylyǵy ónimderin óndirýdiń barlyq derlik baǵyttary nesıeleýmen qamtylatyn bolady. Onyń ishinde et jáne sút mal sharýashylyǵy, jylqy sharýashylyǵyn, qoı sharýashylyǵyn, qus sharýashylyǵyn damytý, kartop pen kókónis ósirý, tehnıka men jabdyqtar satyp alý, sondaı-aq aýyl sharýashylyǵy emes bıznestiń basqa da túrleri bar.

Aıta ketsek, budan buryn Sandyqtaý aýdanynda 4 mıllıard teńgeniń ınvestıtsııalyq jobalary júzege asyp jatqandyǵyn jazǵan edik.