Aqmola oblysynda aýsyl aýrýyna baılanysty joıylǵan maldardyń ıelerine tıisti ótemaqylar berilýde
ASTANA. Maýsymnyń 21-i. QazAqparat /Gúlmıra Álıakparova/ - Aýsyl aýrýynyń anyqtalýyna baılanysty Aqmola oblysynda joıylǵan úı janýarlarynyń ıelerine QR Úkimetiniń Qaýlysyna sáıkes tıisti ótemaqylar berilýde.
Bul týraly búgin jýrnalısterge bergen suhbatynda QR Aýyl sharýashylyǵy mınıstrligi Agroónerkásip keshenindegi memlekettik ınspektsııa komıteti basqarmasynyń bastyǵy Aqyn Yspulaev aıtty.
«QR Úkimetiniń Qaýlysyna sáıkes ótemaqynyń kólemi - maldyń naryqtaǵy ortasha baǵasynyń 50 paıyzyna teń. Mysalǵa, búgingi kúni sıyrdyń naryqtaǵy ortasha quny shamamen 70-75 myń teńge turady. Bul naqty baǵa jáne ótemaqy mal joıylýǵa alynǵan kúni qolma-qol tólenedi», - dep atap ótti ol.
Eske sala keteıik, QR Aýyl sharýashylyǵy mınıstrliginiń Agroónerkásiptik keshenindegi memlekettik ınspektsııa komıtetiniń oblystyq aýmaqtyq ınspektsııasy maýsymnyń 15-i kúni, Aqmola oblysy Ereımentaý aýdany Novodolınka aýylynda tekserý júrgizip, 241 iri qara mal basynan «O» antıgen tıpti aýsyl aýrýyn tapqan bolatyn.
A.Yspulaev anyqtaǵandaı, bul aýmaqta barlyǵy 2 myńǵa jýyq bas mal joıylýǵa jatady. Búginge deıin jumystardyń 80 paıyzy oryndaldy.
