Aqmola oblysynda aýrýhanadan shyǵyp, joǵalyp ketken áıeldiń denesi orman alqabynan tabyldy
KÓKShETAÝ. QazAqparat - Aqmola oblysynda aýrýhanadan shyqqan áıeldiń denesi orman alqabynan tabyldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, bıylǵy jyldyń 6 qyrkúıeginde Arshaly aýdandyq polıtsııa bólimine Aqkól qalasynyń turǵyny 31 jastaǵy áıelden 60 jastaǵy qaıyn enesin izdeýge kómek kórsetý týraly ótinish tústi.
Áıeldiń aıtýynsha, enesi qyrkúıektiń 6-da saǵat 14:00 shamasynda Arshaly aýdandyq aýrýhanasynan shyǵyp, belgisiz baǵytta ketip qalǵan.
«Bul fakti sotqa deıingi tergeýdiń biryńǵaı tiziliminde tirkeldi. Sotqa deıingi tergeý barysynda joǵalǵan kelini men onyń ulynan jaýap alyndy. Ol anasynyń Shortandy aýdanynyń Jolymbet aýylynda inisimen birge turatynyn túsindirdi. Bıylǵy jyldyń 18 tamyzynda ol aýyryp, Arshaly aýdandyq aýrýhanasyna jiberildi. Áıel komaǵa tústi. Osy jyldyń 25 tamyzynda ózine kelgen áıel týystarymen baılanysqa shyǵyp, olarmen telefon arqyly sóılesti. Al, bıylǵy jyldyń 3-shi qyrkúıeginen bastap áıeldiń uıaly telefony óshirilgen», - dep túsindirdi QazAqparat tilshisiniń saýalyna oblystyq polıtsııa departamentiniń baspasóz hatshysy Gúlnar Pınchýk.
Polıtsııa departamentiniń baspasóz hatshysy atap ótkendeı, 6-shy qyrkúıekte áıel aýrýhanadan shyǵarylýy kerek edi. Alaıda, Arshaly kentine kelgen týystary ony aýrýhanadan tappady. 60 jastaǵy áıel ózin alyp ketýge uly keldi dep, aýrýhanadan shyǵyp ketken. Bastapqyda joǵalǵan adamnyń týystary ony óz betinshe izdep tabýǵa tyrysty, odan nátıje bolmaǵan soń polıtsııaǵa júgingen.
«Jedel-izdestirý sharalary barysynda polıtsııa qyzmetkerleri Arshaly kenti boıynsha ornalasqan beınebaqylaý kameralarynyń jazbalaryn qarady, «Arshaly-Nur-Sultan» qatynasymen tasymaldaýdy júzege asyratyn taksı júrgizýshilerinen jaýap alyndy, adamdar kóp jınalatyn oryndarda baǵdarlar japsyryldy, Arshaly aýdanynyń polıtsııa bóliminiń qyzmetkerleri joǵalǵan adamdy izdeýge jumyldyryldy, 6505 áskerı bóliminiń atqyshtar rotasy kúshterin tarta otyryp, Aqbulaq, Ijevskoe aýyldary jáne Arshaly stansasy eldi mekenderi aýmaǵyn súzip shyqty. Qyrkúıektiń 9-da vokzal mańyndaǵy orman alqabynan joǵalǵan áıeldiń denesi tabyldy. Osyǵan baılanysty saraptama taǵaıyndaldy», - dep tolyqtyrdy Gúlnar Pınchýk.
Osy másele boıynsha QazAqparat tilshisi Aqmola oblystyq densaýlyq basqarmasyna habarlasyp, mán-jaıdy surap bildi. Ondaǵylar ázirshe eshqandaı aqparat bere almaıtynyn, basqarama basshylyǵy men mamandary Arshaly aýdanyna attanatynyn, keıin qosymsha aqparat joldanatyn aıtyp túsindirdi.
Aıta ketsek, bul týraly Baqytbek Qadyr esimdi jeli qoldanýshy Facebook-tegi paraqshasynda jazǵan bolatyn. Onda ol aýrýhanadan shyǵyp, orman ishinen denesi tabylǵan áıeldiń 1961 jylǵy Asqar Qazıman ekenin aıtady. Ony izdeýge balalary men týystary, polıtsııa qyzmetkerleri jáne 30-ǵa jýyq eriktiler tartylyp, úsh kún boıy izdestirgen.
