Aqmola oblysynda aýdandyq mańyzy bar joldardy sý shaıyp jatyr
KÓKShETAÝ. QazAqparat – Aqmola oblysynda aýdandyq mańyzy bar avtojoldardy avtojoldy sý shaıyp jatyr. Bul jaıynda QazAqparat tilshisine jergilikti turǵyndar beınejazba joldap, jaǵdaıdy jetkizdi.
Beınejazbadan Astrahan aýdanynyń Pervomaı jáne Novocherkaskoe aýyldyq okrýgteriniń aýmaǵyndaǵy avtojoldardy sý shaıyp jatqanyn kórýge bolady.
«Bul - Astrahan aýdany Pervomaı aýyl okrýgi mańyndaǵy avtokólik joly. Jol ústimen aǵyp ótip jatqan sýdyń tereńdigi - 10 santımetr, eni - 60 metr shamasynda. Bul ýchaske jyl saıyn jabylatyn edi. Bıyl jabylǵan joq. Joldyń jabylýy aǵyn sý men Esil ózendegi sýdyń deńgeıine baılanysty anyqtalady. Aýyl turǵyndary Prımshımskoe aýyly arqyly ótetin balama jolmen qatynaı alady», - deıdi beınejazba avtory.
Óńirdegi avtojoldardy sý shaıyp jatqanyn Aqmola oblystyq TJD baspasóz qyzmeti de rastady.
Vedomstvodan atap ótkendeı, qazirgi kezde oblystyń birqatar aýdandarynda sý shaıyp jatqan avtojoldar bar.
Biraq, aǵyn sý kólik qatynasyna kedergi keltirip jatqan joq.
Astrahan aýdanynan bólek, búgin tańerteń Ereımentaý aýdanynyń Qyzyltý aýylyna kireberistegi joldy da sý shaıyp ketti.
Astrahan aýdanynyń ákimi Nurlan Seıilovtiń aıtýynsha, óńirde aǵyn sýdy apatsyz ótkizý boıynsha barlyq qajetti sharalar qabyldanyp jatyr.
Aýdan aýmaǵynda sý shaıyp ketý qaýpi bar 9 eldi meken anyqtalǵan.
«Aýdan boıynsha barlyǵy 87 myń tekshe metr qar shyǵarylyp, 460 tekshe metr sý soryldy. Sonymen birge, sý ótkizý júıeleri men jyralar tazartyldy. Sý tasqyny kezeńi bastalǵanǵa deıin avtomobıl qatynasy úzilýi múmkin eldi mekenderden aýyr naýqastar, júkti áıelder qaýipsiz jerge shyǵaryldy. Sondaı-aq, atalǵan eldi mekenderge aldyn ala azyq-túlik pen dári-dármek jetkizildi. Asa qaýipti ýchaskelerdegi eldi mekenderdi sý basý nemese onyń qaýpiniń aldyn alý maqsatynda ózender men gıdrotehnıkalyq qurylystardaǵy sý deńgeıin baqylaý úshin qosymsha gıdrobeketter uıymdastyrylyp otyr», – dep túsindirdi Nurlan Seıilov.
Aıta ketsek, Aqmola qutqarýshylary sý tasqyny qaýpi bar ózen-kólderdi táýlik boıy kúzetip otyr.
