Aqmola oblysynda Atbasar aýdandyq ІІB bastyǵy paramen ustaldy
ASTANA. QazAqparat - Aqmola oblysynda Atbasar aýdandyq ishki ister bóliminiń bastyǵy, polıtsııa podpolkovnıgi Túbekov Sh.A.-nyń qylmystyq qyzmetiniń joly kesildi, dep habarlaıdy «QazAqparat» HAA Sybaılas jemqorlyqqa qarsy is-qımyl ulttyq bıýrosynyń Feısbýktegi paraqshasyna silteme jasap.
«Sybaılas jemqorlyqqa qarsy is-qımyl ulttyq bıýrosy Aqmola oblysy, Atbasar aýdanynyń ákimi Nıkıshov A.N.-ge qatysty qylmystyq isti tergeý barysynda Atbasar aýdandyq ІІB bastyǵy polıtsııa podpolkovnıgi Túbekov Sh.A.-nyń qylmystyq qyzmetiniń jolyn kesti.
Tergeýde Túbekov Sh.A. ústimizdegi jyldyń maýsymynan beri kóshi-qon zańdylyǵyn buzý faktisi boıynsha ákimshilik jaýapqa tartylmaý úshin «Lana NQK» JShS dırektory Shaıkenov E.R.-dan para alyp kelgendigi anyqtaldy» - delingen Sybaılas jemqorlyqqa qarsy is-qımyl ulttyq bıýrosynyń habarlamasynda.
400 myń teńge mólsherindegi kezekti parany alǵannan keıin Túbekov Sh.A. qylmysy áshkerelenip, 11 qazanda ustalyp, Kókshetaý qalalyq ІІB ýaqytsha ustaý oqshaýlaǵyshyna qamaldy.
Óz aıybyn tolyq moıyndaǵandyqtan, Shaıkenov E.R.-ǵa qatysty protsessýaldyq ustaý sharasy qoldanylmady.
Sotqa deıingi tergeý amaldary júrgizilýde.
