Aqmola oblysynda astyq satý máselesi áli kúrdeli kúıinde tur - S. Jalmaǵambetova
ASTANA. Aqpannyń 25-i. QazAqparat /Qanat Mámetqazyuly/ - Aqmola oblysynda astyq satý máselesi áli kúnge kúrdeli kúıinde tur. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Svetlana Jalmaǵambetova osylaı málim etti,
dep habarlaıdy QazAqparat.
«Úkimet astyq óndirýshilerge olardyń astyqtaryn úkimetaralyq kelisimder boıynsha satýǵa, sondaı-aq memlekettik rezervke satyp alýǵa járdemdesetini týraly ýáde bergen sekildi edi. Buǵan baılanysty bıýdjetten 5 mlrd. teńgege jýyq qarajat bólindi, astyqtardy porttarǵa jetkizý úshin tıisti qarjy jumsaý týraly kelisildi. Alaıda, ókinishke qaraı, Aqmola oblysy boıynsha astyqty satý máselesi qıyndap otyr. Jurtshylyqpen kezdesýler barysynda bul másele alǵa tartyldy. Sandyqtaý, Zerendi, Bulandy jáne basqa da aýdannyń aýyl sharýashylyǵy taýaryn óndirýshileri qalyptasqan jaǵdaıǵa oraı úlken alańdaýshylyqtaryn tanytyp otyr», dedi senator. Onyń aıtýynsha, tipti «Azyq-túlik korporatsııasy» tarapynan satyp alynady delinetin astyqtyń ózi elevatorlarda jatqan kórinedi. Osyǵan oraı, S. Jalmaǵambetova búgingi kúni astyqty satý men saqtaýǵa qatysty kepildikter bolmaı otyrǵanyn alǵa tartty. Onyń sózine qaraǵanda, aqpannyń 24-indegi málimetter boıynsha ishki azyqtyq qajettilikterdi qosa alǵandaǵy 5 mln. 343 myń tonna astyqtyń 1 mln. 325 myń tonnasy ǵana satylǵan. «Sondyqtan, Úkimet astyqty satýǵa qatysty sharalardy jedeldetý qajet dep bilemiz», dedi S. Jalmaǵambetova.
