Aqmola oblysynda ASHYQ jobasy boıynsha toǵyz nysan iske qosyldy
KÓKShETAÝ. QazAqparat - Aqmola oblysynda ASHYQ pılottyq jobasyn iske asyrý bastaldy. Birneshe kúnniń ishinde óńirde 20-dan astam kásipker jobaǵa qatysýǵa ótinim berdi, olardyń 9-y júıede jumys isteýge ruqsat aldy, dep habarlaıdy QazAqparat tilshisi.
Aqmola oblysy sanıtarlyq-epıdemıologııalyq baqylaý departamentiniń, óńirdiń kásipkerlik jáne ónerkásip basqarmasynyń, sondaı-aq «Atameken» ÓKP ókilderi atalmysh joba boıynsha jumysty bastaǵan Kókshetaý qalasynyń birneshe nysandaryn aralap kórdi.
«ASHYQ mobıldi qosymshasy sary nemese qyzyl mártebesi bar tulǵalardyń qozǵalysyn baqylaýǵa múmkindik beredi. KVI-men aýyratyn adamdarmen baılanysta bolǵan adamdar úshin sary dáreje, KVI-men aýyratyn jáne oń PTR-testi bar adamdar úshin qyzyl dáreje. Eger ol jobaǵa qatysatyn obektilerge ótýge tyryssa, onda onyń derekteri kórsetiledi jáne birden bizge túsedi. Osydan keıin sanıtarlyq qyzmetter bul adamdarmen ákimshilik jaza qoldanǵanǵa deıin jumys isteı bastaıdy, bul degen QR ÁQbK 462 babynyń 3 bóligi boıynsha aıyppul», - deıdi Aqmola oblysy sanıtarlyq-epıdemıologııalyq baqylaý departamenti basshysynyń orynbasary Sáýle Sádýaqasova.
Aqmolalyq kásipkerler ASHYQ pılottyq jobasy boıynsha jumys isteı bastady.
Aqmola oblystyq Kásipkerler palatasynyń sarapshysy Jaısan Bekqojınniń aıtýynsha, búginde óńirde 20-ǵa jýyq nysan jobaǵa qatysýǵa ótinim bergen, olardyń 9-y QR - kodty (7-Kókshetaýda jáne 2-Stepnogorskide) alyp, júıede jumys isteı bastady. Ótinimderdiń basym bóligi qoǵamdyq tamaqtaný salasynan túskender. Bul qosymsha karantın men pandemııadan uzaq ýaqyt zardap shekken kásipkerlerdiń jumysyn jeńildetýge arnalǵan. Eger Aqmola oblysy «qyzyl» aımaqta bolýdy jalǵastyrsa da, kásipkerler jańa jobanyń arqasynda demalys kúnderi jumys isteı alady. Alaıda aqmolalyqtar úshin qosymsha erekshe másele týdyrmaıdy. Eger adam ASHYQ-ke tirkelmese, onda onyń kirýdegi dárejesin JSN arqyly tekserýge bolady.
J.Bekqojınniń sózinshe, eger obektide úsh kún ishinde kelýshiler tirkelmese, kásipker eki aptaǵa baǵdarlamadan shyǵarylady. Qaıta tirkeý kezinde erekshelik eki aıǵa sozylady. Bul mekemelerge kelýshilerdi skanerleýdiń saqtalýyn baqylaýǵa múmkindik beredi. Sáýirdiń 26-nan bastap ASHYQ jobasyna Aqmola oblysynyń barlyq óńirleri qosyla bastaıdy.
Eske sala keteıik, buǵan deıin Aqmola oblysy eldegi epıdemıologııalyq jaǵdaıdy baqylaý úshin ázirlengen Ashyq pılottyq jobasyna qosylǵany habarlanǵan bolatyn.
