Aqmola oblysynda «Ashyq ákimdik» ótti
«Kókshetaý» mádenıet saraıynda uıymdastyrylǵan ashyq ákimdikte qabyldaýǵa kelgen azamattar oblystyq departamentter men basqarmalardyń, Kókshetaý qalasynyń ákimdigi, quqyq qorǵaý organdary, kommýnaldyq qyzmetter, azamattarǵa arnalǵan úkimet korporatsııasy men ekinshi deńgeıli bankterdiń basshylaryna ǵana emes, aımaq basshysyna tolǵandyrǵan suraqtaryn qoıyp, jaýap aldy.
Shara Memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men gúldenýiniń negizi» atty Joldaýyndaǵy bılik pen halyqtyń arasynda baılanysty nyǵaıtýdaǵy mindetterdi júzege asyrý sheńberinde qolǵa alynyp otyr.
«Memlekettik organdardyń aldynda halyqpen konstrýktıvti baılanys ornatyp, tolǵandyrǵan suraqtary men máselelerin jyldam sheshý maqsatynda «Estıtin memleket» tujyrymdamasyn júzege asyrý mindeti tur. Búgin qabyldaýǵa kelgen adamnyń árbireýi óz saýalyn tıisti vedomstvo basshylaryna qoıyp, jaýabyn aldy», dedi aımaq basshysy Ermek Marjyqpaev.
Máselen, Zerendi aýdany Igilik aýylynyń turǵyny Nurahmet Ýálıev Kenesary men Igilik aýyly arasyndaǵy jol máselesine qatysty saýalyn qoıdy.
Onyń aıtýynsha, aýyl turǵyndary aýyl sharýashylyǵy ónimderin oblys ortalyǵyna ákelý kezinde jol azabyn tartady eken. Oblys ákimi jol máselesin sheshýge atsalysatynyn aıtty. Osy aýdanynyń taǵy bir turǵyny Shaǵalaly ózeniniń ústinen ótetin kópir qurylysy jóninde saýal qoıdy. Bul máseleni aımaq basshysy óz baqylaýyna alynatyn aıtyp, túsindirdi.
Jalpy, «Ashyq ákimdik» qabyldaýyna 300-de astam aqmolalyq kelip qatysty. Turǵyndardyń kóbi aımaq basshysyna baspanamen qamtý, jer telimin alý, kásipkerlikti damytý, jol jáne abattandyrý máselelerine qatysty saýaldaryn joldady.
