Aqmola oblysynda alty mashına tıelgen júk kóligi aýdaryldy

ASTANA. QazAqparat – Ekaterınbýrg - Almaty avtojolynda 6 avtokólik tıelgen Mercedes Actros aýdarylyp qaldy. Júrgizýshi oqıǵa ornynan jasyrynýǵa tyrysqan, dep habarlaıdy QazAqparat POLISIA.KZ telegram kanalyna silteme jasap.

Jol apaty 21 qazan kúni bolǵan. Mercedes Actros júrgizýshisi rólge ıe bola almaı qalǵan. Sondaı-aq, jol-kólik oqıǵasy kezinde júrgizýshi jeńil dárejede mas kúıde bolǵan. Ol apat jasaǵannan keıin oqıǵa ornynan jasyrynýǵa tyrysqan.

Apat saldarynan adamdar zardap shekken joq, tek mashınalar mehanıkalyq zaqymdandy. Materıaldyq zalal naqtylanatyn bolady.

33 jastaǵy júrgizýshige qatysty rólge mas kúıinde otyrǵany úshin QR ÁQBtK-niń 608-baby boıynsha ákimshilik hattama toltyryldy. Sondaı-aq, ol apat ornynan ketip qalǵany úshin QR ÁQBtK-niń 611-baby boıynsha jaýapkershilikke tartyldy. Materıaldar sotqa jiberildi.