Aqmola oblysynda alkogoldi zańsyz aınalymǵa shyǵarýdyń 24 faktisi tirkeldi
KÓKShETAÝ. QazAqparat - Aqmola oblysynda jyl basynan beri alkogoldik ónimderdi zańsyz aınalymǵa shyǵarý boıynsha 24 oqıǵa tirkeldi, dep habarlaıdy QazAqparat tilshisi.
Aqmola oblysy boıynsha memlekettik kirister departamentiniń málimetine qaraǵanda, oblys boıynsha zańsyz aınalymda júrgen 890 958 shólmek kontrafaktili alkogoldik ónimder tárkilendi.
Onyń ishinde 5 lıtrli ydystarǵa bólip quıylǵan 52 254 lıtr etıl spırti, 24 229 lıtr araq zańsyz aınalymnan alyndy. Osyǵan baılanysty 13 qylmystyq jáne 34 ákimshilik is qozǵaldy. Zańbuzýshylyqqa jol bergen tulǵalaraǵa 4,9 mıllıon teńge kóleminde aıyppul salyndy.
Jalpy, Aqmola oblysy boıynsha memlekettik kirister departamentiniń qyzmetkerleri jedel izdestirý jáne tekseris sharalary barysynda jyl basynan beri alkogoldik ónimderdi zańsyz aınalymǵa shyǵarý boıynsha 24 oqıǵany anyqtady. Onyń kópshligi lıtsenzııa men ruqsat qujattarynyń joqtyǵymen baılanysty bolsa, toǵyz jaǵdaıda eseptik-baqylaý markasy bolmaı shyqty.
Eske sala keteıik, Aqmola oblysy aýmaǵynda alkogoldik ónimder shyǵaratyn «Kókshetaý mıneraldy sýlary» AQ, «Natýrprodýkt» JShS, «RANG-Realty» JShS, «Grand Royal Bottlers» JShS tárizdi tórt zaýyt jáne spırt óndiretin «Aıdabol spırt zaýyty» AQ men «Bıokorm» JShS jumys isteıdi.
Oǵan qosa, alkogoldik ónimderdi bólshek jáne kóterme saýda arqyly satatyn 2600 astam saýda núktesi tirkelgen.
