Aqmola oblysynda «alqaptan sórege deıin» jobasy júzege asyrylýda

KÓKShETAÝ. QazAqparat tilshisi - Ótken jyly Memleket basshysy «alańnan sórege deıin» jobasynyń ıdeıasyn jarııa etti. Onyń máni fermerlerge ósirilgen ónimdi esh qıyndyqsyz jáne artyq shyǵynsyz tutynýshylarǵa satýǵa kómektesý, dep habarlaıdy QazAqparat oblystyq ishki saıasat basqarmasynyń baspasóz qyzmetine silteme jasap.

Aımaq «pılotqa» kirmegenimen, aqmolalyqtar Almaty, Jambyl jáne Túrkistan oblystary kásipkerleriniń tájirıbesin qoldanýǵa sheshim qabyldady. Stepnogorsk turǵyndary ótken jyly iske qosqan «alqaptan sórege deıin» jobasyn júzege asyrý óz nátıjesin berýde. Bıznes-ıdeıanyń avtory jáne «Ar-Aı» kooperatıviniń jetekshisi Gúlmaıra Baımaqova bolsa, «zákirli» kásiporyn onyń otbasyna tıesili «Oljas» sharýa qojalyǵy. Jobaǵa «Bastaý» jobasynyń túlekteri de qosyldy. Ómirzaq Ótelov pen Bahrom Andaqulov jobaǵa 7 mln teńgege jýyq óz qarajatyn saldy. Ótken jyly kooperatıv músheleri 3,5 ga kartop, 0,5 ga sábiz jáne qyzylsha otyrǵyzdy. Al aǵymdaǵy jyly egistik alqaby 10 ga deıin ulǵaıdy, sonymen birge, qııar, qyryqqabat, qyzylsha, sábiz, shalǵam, kartop sııaqty kókónisterdiń assortımenti de ulǵaıdy.

«Qazirgi ýaqytta biz ortasha eseppen kúnine bir jarym tonna kókónisti jóneltemiz. Mysaly, qııar 400 kg, qyryqqabat 700 kg shamasynda jınaldy. Uıymdastyrylǵan ótkizý núktelerinen basqa ónimder tikeleı astanalyq bazarlarda satylady, Sonymen birge, taýarlar Stepnogorsk ákimdigi uıymdastyratyn jergilikti jármeńkege qoıylady», – dedi Gúlmaıra Baımaqova.

Aýyl sharýashylyǵy basqarmasynyń málimetinshe, Aqmola oblysy da pılottyq jobaǵa enýdi josparlap otyr, osyǵan baılanysty aýyl sharýashylyǵy mınıstrligine bıýdjettik ótinim joldandy. Azyq-túlik taýarlaryn turaqty satyp alýdy qamtamasyz etýge ishki saýdanyń 13 sýbektisi qatysady dep kútilýde. Saýda jelileri úshin ónim óndirý protsesine 10 sharýa qojalyǵyn, 12 agrarlyq ónim óndirýshini, 10 qaıta óńdeý kásipornyn tartý josparlaǵan.

Aqmola oblys boıynsha kásipkerler palatasynda atap ótkendeı, bolashaqta joba jeke aýlalarǵa, sharýa-fermerlik sharýashylyqtarǵa óz ónimderin qaıta óńdeý kásiporyndaryna ótkizýdi qamtamasyz etýge múmkindik beredi.

«Sońǵy nátıjege yntalanǵan birden birneshe qatysýshynyń kooperatsııasy óndiristik-ótkizý tizbegine enedi: tutynýshylar sapaly jáne qymbat emes ónim alady, al óndirýshiler laıyqty tólem alady», – dep atap ótti ÓKP dırektory Erqanat Musylmanbek.