Aqmola oblysynda alıment tólemegen 51 jastaǵy áke isti boldy
KÓKShETAÝ. QazAqparat – Aqmola oblysynda alıment tóleýden qashyp júrgen kókek ákeler izdestirilip jatyr, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 2020 jyly Aqmola oblysy boıynsha alıment tóleýden qashyp júrgen 58 er adamǵa izdeý jarııalanyp, onyń 55-niń mekejaıy anyqtalǵan.
«Balalardy asyrap-baǵýǵa arnalǵan qarajatty tóleý mindetin oryndamaǵany úshin 600 saǵatqa deıin qoǵamdyq jumysqa, QR ÁQbK kodeksiniń 669-baby boıynsha ákimshilik jaýapkershilik tartý, sondaı-aq, bas bostandyǵyn shekteý nemese 2 jylǵa deıin aıyrý merzimi qarastyrylǵan» dedi vedomstvodan.
PD baspasóz qyzmetinen atap ótkendeı, bıylǵy jyldyń 13 qańtarynda Kókshetaý qalasynyń polıtsııa basqarmasyna 51 jastaǵy azamattyń alıment qaryzyn óndirip alý týraly jeke sot oryndaýshysynan usynys túsken.
Onda Kókshetaý qalasy turǵynynyń 1 mıllıon teńgeden astam alıment qaryzy bary aıtylǵan.
«Qazirgi ýaqytta osyǵan baılanysty Qylmystyq kodekstiń 139-baby boıynsha is qozǵalyp, sotqa deıingi tergeý amaldary júrgizilýde» dep tolyqtyrdy vedomstvodan.
