Aqmola oblysynda alǵash ret Qanysh Sátpaevtyń eskertkishi ornatylady
ASTANA. QazAqparat - Atalǵan bastamany Stepnogorsk qalasynyń basshylyǵy iske asyrýǵa bel baılap otyr, dep habarlaıdy QazAqparat tilshisi jergilikti «Prestıj» gazetine silteme jasap.
Jospar boıynsha qoladan quıylatyn Sátpaev tastyń ústinde turady. Bir qolynda plaş ustaıdy. Ózi sonaý kókjıekke -taý-ken salasynyń áli de zerttelmeı jatqan máselelerine kóz tastap turǵandaı bolady. Eskertkishtiń bıiktigi - 7 metr. Oǵan qosa, 3,6 metrlik tuǵyr qoıylady. Al monýmenttiń ózin qala avtovokzaly mańaıynda ornatý josparlanyp otyr. Qanysh Sátpaevtyń eskertkishi mańaıynda saıabaq bolady.
«Endi, Kókshetaýda ShoqanÝálıhanov pen Abylaı hannyń eskertkishteri bar. Ereımentaýda Bógenbaı batyrdyń alyp músini tur. Al Stepnogorskide ondaı eskertkish joq. Qala kezinde ýran men altyn óndiretin ortalyq retinde Saryarqanyń tósinde ashylǵan edi. Bul - kenshilerdiń shahary, óndiris oshaqtarynyń qalasy. Sol sebepti vokzaldyń mańaıynda ornatylatyn eskertkish dál osy salanyń tanymal tulǵasyna arnalǵan jón. Búginde Aqmola oblysy taý-ken salasynyń iri aımaǵy bolyp sanalady. Soǵan qaramastan, birde-bir eldi mekende Qanysh Sátpaevqa arnalǵan eskertkish joq. Negizi, Qanysh Sátpaevtyń eńbekteri negizinde osy óńirde kóptegen kenishter ashyldy. Ony da eskerý kerek», - deıdi qala ákiminiń orynbasary Gúlnáz Ábilova.
Qanysh Sátpaevtyń eskertkishin Qazaqstan sýretshileri odaǵynyń múshesi, professor ári músinshi Azat Baıarlın jasaıdy. Onyń jetekshiligimen Astana qalasynda (burynǵy Tselınogradta) Sáken Seıfýlınniń eskertkishi, Kókshetaýda - Abylaı han, Omby qalasynda - Shoqan Ýálıhanov eskertkishi jáne taǵy basqa jobalar iske asty. Búginde ol Qanysh Sátpaevtyń eskertkishin Máskeý qalasynda ázirleýdi usynyp otyr. Sebebi ol jaqta qoladan eskertkish quıý kásibi jaqsy damyǵan. Jalpy, Stepnogorsk qalasynda atalǵan eskertkishti ornatý jáne sonyń aınalasyn abattandyrý jumystaryna 35,6 mln teńgeqarastyrylǵan.
