Aqmola oblysynda áleýmettik qyzmet kórsetý ortalyǵynyń basshylyǵy 17 mln teńgeni jymqyrǵan

KÓKShETAÝ. QazAqparat - Tselınograd aýdanyndaǵy «Shapaǵat» arnaıy áleýmettik qyzmet kórsetý ortalyǵynyń dırektory men basqa da tulǵalardyń aqshalaı qarajatty jymqyrǵandyǵy áshkerelendi, dep habarlaıdy QazAqparat tilshisi.

«Tergeý barysynda anyqtalǵandaı, Tselınograd aýdanyndaǵy «Shapaǵat» arnaıy áleýmettik qyzmet kórsetý ortalyǵynyń dırektory men basqa da tulǵalary óz qalaýy boıynsha, sondaı-aq ortalyqtyń qyzmet alýshylaryn habardar etpeı jáne kelisiminsiz notarıaldyq senimhattardy paıdalana otyryp, olardyń aqshalaı qarajatyna bılik etken. Sonymen qatar, tergeý bul mekemege 2019-2021 jyldar aralyǵynda jalaqy jáne basqa tólemder túrinde aqsha berilgen jáne aýdarylǵan is júzinde jumys istemegen tulǵalar resmı túrde jumysqa ornalasqandyǵyn anyqtady. Bıýdjet qarajatyn urlaýdan keltirilgen zalal kólemi 17 mıllıon teńgeden asty. Qylmystyq is sotta qaralýda», - dedi Aqmola oblysy boıynsha Sybaılas jemqorlyqqa qarsy is-qımyl departamentiniń baspasóz qyzmetinen.

Vedomstvodan atap ótkendeı, quqyq buzýshylyqtardyń qaıtalanýyna jol bermeý maqsatynda Sybaılas jemqorlyqqa qarsy is-qımyl departamenti qylmystyq is sheńberinde sybaılas jemqorlyqqa qarsy monıtorıng júrgizdi, onyń usynymdary sybaılas jemqorlyqtyń sebepteri men jaǵdaılaryn joıý boıynsha pármendi sharalar qabyldaý týraly usynysqa engizildi (QPK-niń 200-babynyń tártibimen).

Atap aıtqanda, usynysta basshylardyń óz qaramaǵyndaǵy qyzmetkerleri qyzmetine tıisti baqylaýdy, áleýmettik sala qyzmetkerleriniń sybaılas jemqorlyqqa qarsy zańnamany múltiksiz saqtaýyn, sondaı-aq memlekettik qyzmetterdi kórsetýdiń jáne mekemelerdiń qarjy-sharýashylyq qyzmetiniń ashyqtyǵy men aıqyndyǵyn qamtamasyz etý qajettiligi kórsetilgen.

Sonymen qatar, óńirlik Sybaılas jemqorlyqqa qarsy qyzmeti men Jumyspen qamtýdy úılestirý jáne áleýmettik baǵdarlamalar basqarmasynyń basshylyǵy sybaılas jemqorlyqtyń aldyn alý máselelerin talqylaý boıynsha kezdesý ótkizdi.

Kezdesý barysynda oblystyq Antıkor basshysy Arman Rahımov atap ótkendeı, tergeý áleýmettik qorǵaý salasynda kemshilikter oryn alǵanyn kórsetti. Halyqtyń áleýmettik osal toptaryn qorǵaý boıynsha qajetti sharalar qabyldaýǵa tıis josyqsyz laýazymdy tulǵalar, kerisinshe, odan paıda tabady. Mundaı sheneýnikter, sondaı-aq olardyń basshylary mindetti túrde qatań jaýapkershilikke tartylatyn bolady.

Aıta ketsek, budan buryn Aqmola oblysynda bıznespen aınalysqan 10 sheneýnikke 636 myń teńgeden aıyppul salynǵan bolatyn.