Aqmola oblysynda alaıaqtyq jasady dep negizsiz aıyptalǵan eki adam aqtaldy
ASTANA. QazAqparat - Aqmola oblysy Tselınograd aýdandyq sotynda sotqa deıingi tergeý organdarymen alaıaqtyq jasady dep aıyptalǵan Daýren Nurjanov jáne Dııas Jamanqulov aqtaldy, dep habarlaıdy QazAqparat tilshisi QR Joǵarǵy sotyna silteme jasap.
Ustalǵandar ózara sóz baılasyp zardap shegýshi A-ny jańylystyryp onyń turǵyn úı qurylysyna arnalǵan qarajatyn ıemdendi dep aıyptalǵan.
«Sot anyqtaǵandaı, «QazTeplo Gaz» JShS-niń basshylary Nurjanov, Jamanqulov jáne zardap shegýshi A-nyń arasynda avtonomdy gazben qamtamasyz etý boıynsha qurylǵyny ornatý, qurastyrý jáne turǵyn úı qurylysyna baılanysty eki shart bekitilgen. Aryz berýshi birinshi shart boıynsha 2,7 mln teńge tólemin tólep, ekinshi jáne úshinshi tólemderdi tólemegen. JShS-ge shartty ózgertý jáne buzý týraly jazbasha júginbegen.
JShS men zardap shegýshiniń arasyndaǵy shart óz erkimen bekitilgen. JShS-niń tarapynan sharttaǵy qajetti jáne talap etilgen barlyq sharttar oryndalǵan. A-dan alynǵan qarajat JShS-men ishinara ıgerilgen shartta kelisilgen talaptarǵa sáıkes jumys oryndalǵan», - delingen Joǵarǵy sottyń resmı saıtynda.
JShS-niń zardap shegýshi A-ǵa oryndaýǵa mindetti jumystardy oryndaýǵa qarjylyq jáne materıaldyq múmkindigi, naqty aıtqanda shartty iske asyrýǵa barlyq jaǵdaıy bolǵan. Aryz berýshi atalǵan aralyqta shart sommasynan 30 paıyzdan tómen quraıtyn somany tólegen. Zardap shegýshi men JShS-niń arasynda eki shartty tıisinshe oryndamaý boıynsha qylmystyq jaýapkershilikke tartylmaıtyn azamattyq-quqyqtyq qatynastar bolǵan.
«Sot úkimimen Nurjanov jáne Jamanqulov 177-babynyń 4-bóligi «b»-tarmaqshasy boıynsha kinásiz dep tanylyp, olardyń is-áreketinde qylmys quramynyń bolmaýyna baılanysty aqtaldy. Aqtalǵandarǵa qylmystyq jaýapkershilikke zańsyz tartylǵany úshin keltirilgen zııandy óteý quqyǵy berildi. Aqmola oblystyq sotynyń qylmystyq ister jónindegi sot alqasy prokýrordyń apellıatsııalyq ótinishhaty, zardap shegýshi men onyń advokatynyń apellıatsııalyq shaǵymy boıynsha atalǵan qylmystyq isti qarady. Oblystyq sot alqasynyń qaýlysymen Nurjanov pen Jamanqulovqa qatysty Tselınograd aýdandyq sotynyń úkimi ózgerissiz, prokýrordyń apellıatsııalyq ótinishhaty, zardap shegýshiniń jáne onyń ókiliniń apellıatsııalyq shaǵymy qanaǵattandyrýsyz qaldyryldy», - delingen habarlamada.
