Aqmola oblysynda alaıaqtar zeınetkerdiń atyna eki nesıe rásimdegen
KÓKShETAÝ. QazAqparat - Aqmola oblysynda alaıaqtardyń zeınetkerdiń atyna ruqsatsyz eki nesıe rásimdegeni anyqtaldy, dep habarlaıdy QazAqparat tilshisi.
«Aǵymdaǵy jyldyń aqpan aıynda zeınetker Natalıa Shevchýk quqyq qorǵaý qyzmeti ortalyǵyna aryzdanyp, óziniń atyna ruqsatsyz eki nesıe toltyrylǵanyn aıtqan. Eki nesıe de ınternet arqyly onlaın rásimdelgen. Alaıda, qarııanyń gadjeti joq jáne ol ony qoldanýdy da bilmeıdi.
Osy oraıda, notarıýs qarııaǵa qatysty «Zing Kazakhstan» JShS esebine 164 myń teńge, «Capvia» JShS esebine 34 myń teńge kóleminde qaryzdaryn óndirip berý jóninde eki oryndaý jazbasyn jazyp berdi», dep atap ótti prokýratýra ókilderi.
Vedomstvo ókilderiniń aıtýynsha, quqyq qorǵaý qyzmeti ortalyǵynyń prokýrorlary zeınetkerge oryndaý jazbalaryna qarsylyq bildirýge kómektesti. Osynyń nátıjesinde oryndaý jazbalary kúshin joıdy.
«Budan bólek prokýratýranyń talaby boıynsha Kókshetaý qalasynyń polıtsııasy belgisiz adamdardyń ústinen alaıaqtyq áreketi úshin qylmystyq is qozǵap, sotqa deıingi tergeý amaldaryn qolǵa aldy», dep tolyqtyrdy vedomstvodan.
Sonymen qatar, osyndaı kómek Kókshetaý qalasynyń taǵy eki turǵyny A.Qabdreshova men J.Táshimovaǵa da kórsetildi. Olardyń árbireýiniń atyna zańsyz 70 jáne 180 myń teńge kóleminde nesıe toltyrylǵan.
Osy oraıda, zeınetker Natalıa Shevchýk der kezinde quqyǵyn qorǵaýǵa atsalysqan quqyq qorǵaý qyzmeti ortalyǵynyń prokýrorlaryna alǵysyn bildirdi.
«Osy alaıaqtyq oqıǵaǵa baılanysty azamattarǵa jeke qujattarynyń kóshirmesin bireýge nemese úshinshi jaqqa bergende saq bolýǵa shaqyramyz», - dep eskertti azamattardy Aqmola oblysynyń prokýratýrasy.
