Aqmola oblysynda ákimdik qyzmetkerleri tóbelesip qaldy
KÓKShETAÝ. QazAqparat - Aqmola oblysynda Ádep jónindegi keńes tóbelesip qalǵan qaramaǵyndaǵy qyzmetkerlerdi toqtatpaǵany úshin Krasnoıar aýyldyq okrýginiń ákimi Nurlan Aısınǵa sógis jarııalady. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi Aqmola oblysy boıynsha departamentiniń baspasóz qyzmetinen habarlandy.
Qyzmettik tekseris barysynda anyqtalǵandaı, 2018 jyldyń 11 qazanynda Krasnoıar aýyldyq okrýginiń ákimi apparatynyń ǵımaratynda shtattan tys hatshy-referent pen shtattan tys maman sózge kelip qalǵan. Daýdyń sońy tóbeleske ulasyp, saldarynan sońǵysy dene jaraqatyn alǵan. Ol Krasnoıar aýyly emhanasynyń medıtsınalyq kýálandyrýy arqyly rastalǵan. Sonymen qatar, oqıǵanyń kýágeri bolǵan ákim apparatynyń qyzmetkerleri de muny aıǵaqtaǵan.
Nátıjesinde, Ádep jónindegi keńes aýyl okrýgi ákiminiń apparatynda jumys isteıtin azamattyq qyzmetkerlerdiń arasyndaǵy daý-damaıdyń aldyn alatyn sharalardy qolǵa almaǵany úshin Kókshetaý qalasynyń Krasnoıar aýyldyq okýriginiń ákimi Nurlan Aısındi jaýapkershilikke tartyldy.
«QR Memlekettik qyzmetshilerdiń ádep kodeksiniń 9-tarmaǵy 4-tarmaqshasynyń, «QR Memlekettik qyzmet týraly» Zańynyń 10-baby 8-bóliginiń erjelerin buzǵany úshin Ádep jónindegi keńes ony «sógis» túrinde tártiptik jaýapkershilikke tartý týraly uıǵarymǵa keldi», - dep túsindirdi vedomstvodan.
Sonymen qatar, Ádep jónindegi keńes otyrysynda birqatar laýazymdy tulǵalarǵa qatysty tártiptik ister qaraldy. Máselen, Esil aýdanyndaǵy Svobodnoe aýylynyń ákimi Tilektes Júsipov zańsyz aǵash kesken er adamdy QR «Ákimshilik zańbuzýshylyq týraly» Kodekstiń 50-baby 1-bóligi boıynsha ákimshilik jaýapkershilikke tartpaǵan. Osylaısha, ol kináli tulǵanyń jaýapkershilikten qutylyp ketýine jaǵdaı jasaǵan.
Ádep jónindegi keńes QR Memlekettik qyzmetshilerdiń ádep kodeksiniń 5-tarmaǵy 3 jáne 7-tarmaqshalarynyń talaptaryn buzǵany úshin Svobodnoe aýylynyń ákimi Tilektes Júsipovti «qyzmetine tolyq saı emestigin eskertý» túrinde tártiptik jaýapkershilikke tartý týraly usynys Esil aýdanynyń ákimine joldady.
